Adele '30' hralh a kal chhunzawm zel ; Masi hla an rawn inlar ṭan e
Billboard 200 leh Hot 100 chart lamah British singer Adele bawkin ro a la rel. Chutih rual chuan Billboard chart hrang hrangah Krismas hla an rawn lang chho ṭan leh tawh a, Mariah Carey pawh dinhmun sang takah a rawn ding leh ta.
Kum khat chuang album copy maktaduai hralh thei an awm tawh loh hnuah Adele chuan US-ah '30' copy mtd chuang a hralh leh ta ■
Adele bawkin ro a la rel zel e
Billboard 200 chart leh Hot 100 chart-a roreltu chu Adele bawk a ni. '30' hmangin album chart lamah a zawnin kar hnih ro a rel ta chiah a, Hot 100 chart lamah pawh 'Easy on Me' bawkin ro a la rel a, he chart-ah hian he hla hi kar riat chhung ngawt cham tawhin a hun tam ber chu Chart chung berah a hmang a ni.
MRC Data aṭanga a lan dan chuan Adele hian kar liam ta khan equivalent album units 288,000 lai a hmu chhuak leh a, chuta ṭanga 2,25,000 chu album sales niin Adele hian a album hi copy maktaduai chuang a hralh der tawh a, kum khat chhung vela album copy maktaduai hralh tling thei hmasa ber a ni nghe nghe.
Adele hian '30' hi a tlangzarh tirh karah khan album (CD, vinyl LP, cassette leh digital album download) aṭangin copy 6,92,000 lai a hralh nghal a, a kar hnihnaah 2,25,000 hralh leh bawkin Thawhlehni thleng khan copy mtd chuang a hralh tawh a ni.
Taylor Swift chuan nikum July thlaa a tlangzarh 'Folklore' kha nikum October thla khan copy mtd. a hralh tling hman a, chumi hnua copy mtd hralh tling leh thei hmasa ber chu Adele hi a ni ta. Adele hian harsa lo takin US-ah copy mtd a hralh der a, Swift hi nikum chhunga album copy mtd. hralh tling thei awmchhun a ni bawk.
Artist 100 chart lamah pawh Adele bawk hi pakhatna a ni leh nghe nghe.
Mariah Carey a langsar leh tawh
Kumtina Krismas hla lar ṭha leh ziah chu Mariah Carey 'All i want for Christmas is you' a ni. Khawthlang ram lamah chuan he hla hi a lar leh takzet tawh a, kar hmasa lamah khan 12-naah a rawn lang leh tawh a, tunah phei chuan Billboard Hot 100-ah pathumna a ni leh der tawh. Karleh lamah phei chuan a dinhmun a sang leh zualin a rinawm.
Masi hla an rawn inlar ṭan e
Hot 100 top 10-ah Krismas hla a awm nghal nual. Brenda Lee 'Rockin' around a Christmas Tree' chu palina a ni a, Bobby Helms 'Jingle Bell Rock' chu pangana niin Burl Ives 'A holly jolly Christmas' chu pasarihna a ni bawk.
Billboard 200 chart lamah pawh Michael Buble album 'Christmas' chu pathumnaah a rawn invawrh leh der tawh. Vince Guaraldi Trio 'A Charlie Brown Christmas (Soundtrack)' pawh 10-naah rawn invawrhin top 10-a lang phak loah Krismas album eng emaw zat a awm bawk a ni.
Billboard 200 chart top 10:-
1 30 Adele
2 Red (Taylor's Version) Taylor Swift
3 Christmas Michael Buble
4 Sour Olivia Rodrigo
5 Certified Lover Boy Drake
6 Dangerous: The Double Album Morgan Wallen
7 Still Over It Summer Walker
8 An Evening With Silk Sonic Silk Sonic (Bruno Mars & Anderson .Paak)
9 The Highlights The Weeknd
10 A Charlie Brown Christmas (Soundtrack) Vince Guaraldi Trio
The Hot 100 top 5:-
1 Easy On Me Adele
2 Stay The Kid LAROI & Justin Bieber
3 All I Want For Christmas Is You Mariah Carey
4 Rockin' Around The Christmas Tree Brenda Lee
5 Jingle Bell Rock Bobby Helms