Taylor Swift-i'n a thil ṭha tih a bansan lo

Taylor Swift hian hmun tam takah ngaisangtu a nei a, amah pawhin a dah pawimawh thiam ṭhin hle. Natna khuma mu mek te pawh a lo tlawh fo tawh ṭhin a, tun hnaiah pawh amah ngaisangtu cancer vei mek pakhat chu hmaichhanah a hmu a ni.

Swift hian July 14 khan Philadelphia-ah concert a nei a, hemi ṭum hian amah hmuh chaka midang ṭanpuina hial ngentu Lexi Caviston chu a kan a ni. Kum 21 mi Lexi hian cancer natna a vei a, concert chhim chi rual a ni lo. Mahse ami ngaihsan Taylor Swift chu hmuh ngei a duh bawk si avangin a ṭhian hnai tak chuan social media kaltlangin a campaign sak a, an hlawhtling ta a ni.

Lexi Caviston chuan, "Ka hlim tak zet a ni, mumang rama cheng ang mai ka ni a, sawi chhuah thiam a harsa zawk" tiin a hlim zia a sawi. Swift pawhin amah ngaisangtu Lexi Caviston a hmu thei chu lawmawm a tih thu sawiin, duhsakna a hlan ve bawk.