Drake nek chhuak thei an la awm lo Wiz Khalifa a inlar leh tawh

Drake chuan a album 'Scorpion' hmangin Billboard 200 Album chart-ah a zawna a ṭum thum nan No.1 a hauh leh a, nek chhuak thei an la awm lo. Hetih lai hian American rapper Wiz Khalifa chu a rawn inlar a, pahnihna a hauh nghal.

Canadian rapper Drake hian June 29 khan a album panga-na 'Scorpion' hi a tlangzarh a, Billboard chart hrang hrangah a langsar hle. Album chart-ah bik hian a zawnin tum thum No.1 a hauhna a ni tawh a, kar liam ta pawh khan copy 270,000 zet hralh chhuah leh a ni.

Drake album-ah hian hla 25 zet a awm a, zaithiam lar eng emaw zat a thawhpui bawk. JAY-Z, Nicki Minaj, Future, Ty Dolla $ign leh Static Major te a thawhpui a, 'King of Pop' an tih mai Michael Jackson-a aw pawh hriat tur a awm bawk.

'Scorpion' album hian internet lamah pawh zawn a hlawh hle a, record a siam phah hial. Tlangzarh tirh khan Apple Music-ah ringawt pawh darkar 24 chhungin mi maktaduai 170 zetin an stream a, hetiang zat hi tun hmain a la awm ngai lo. Spotify-ah pawh mi maktaduai 132 zetin an stream bawk a, hei pawh hi record thar a ni.

'Rolling Papers 2'
July 13 khan Wiz Khalifa album thar 'Rolling Papers 2' chu tlangzarh a ni a, a hit nghal hle. Billboard chart-ah pawh a lang nghal chart a, Canadian rapper Drake chauh chu a tluk loh awm chhun a ni.

Rolling Papers 2 hi Amaerican rapper Khalifa studio album parukna a ni tawh a, 2011-a Rolling Papers a tichhuah chhunzawmna a ni. He album-ah hian Gucci Mane, Swae Lee, Ty Dolla Sign, PartyNextDoor, Bone Thugs-n-Harmony leh Snoop Dogg te a thawhpui a ni.