American 18% ten smart speaker an nei

Khawvel ram ropui ber nia sawi ṭhin, United States-ah khuan mihring maktaduai 327.16 vel zet an cheng mek a, chung zinga 18% zet chuan smart speaker an hmang.

Smart Audio Report chuan tun hnai khan report an tichhuak a, mi maktaduai 48 zet chuan an mahni pual smart speaker hi an nei hrang a ni. Report aṭanga a lan dan chuan a tam zawk chu kum 18 chin chung lam an ni a, kum hmasa lam aiin 2% in a puang a ni.

Smart speaker hmangtu 26% zet chuan an ngaihpawimawh hmasak ber pawl a nih thu an sawi a, 74% chuan kawl ve hrim hrim an duh. Mipa aiin hmeichhe zingah nei an tam zawk a, rimawi an ngaithla nasa zawk a ni. Smart speaker hmangtu tam ber chuan rimawi ngaithlak nan an hmang a, chu chu 90% zet a tling.

US khu khawvela smart speaker hralh chhuah hnem na ber a ni a, China chuan a dawt a ni. Khawvel puma hralh chhuah zawng zawng aṭanga 45.6% zet chu US ringawt khuan a hauh phak a, China (20.0%) leh South Korea (8.1%) te chu a sang zual an ni bawk. Chinese smart speaker siamchhuaktu lar Alibaba leh Xiaomi te kut chhuak hralh a kal hle.