Mi-17V5 helicopter Chief of Defence Staff General Bipin Rawat chuanna chu

Indian Air Force retired officer pakhat chuan Nilainia Chief of Defence Staff Gen Bipin Rawat leh midang 13 chuanna helicopter che sual ta, Mi-17V5 kha sipai helicopter him ber leh tunlai ber niin a sawi tih Indian Express chuan an tarlang tlat mai!

Mi-17V5 lei tur hian India sorkar leh Russia rama a siamtute chuan kum 2008 khan $tluklehdingawn 1.3 hu inremna an ziak a, hemi hnuaiah hian Mi-17V5 helicopter hi 80 siam turin an inrem a ni.

Kum 2013 aṭang khan hehelicopter hian India ram a rawn thleng ṭan a, kum 2018 kha a batch hnuhnung ber rawn thlen kum a ni.

Russian indo-helicopter Mi-17-te hi Kazan leh Ulan-Ude-ahte a siamna hmun a awm a, Russia lamah chuan Mi-8M ti pawhin an sawi ṭhin. Kum 1975-ah daih tawh khan Mi-17 helicopter-te hi an lo thlawh chhintir tawh a, ram hrang hrang 60 velah heng helicopter-te hi an hmang tawh a, tun thleng hian an la siam reng bawk.

Tuna Gen Bipin Rawat-te chetsualna helicopter variant hi Mi-17V5 an ti a, Russia ram lamah erawh chuan Mi-8MTV-5 tiin an sawi thung a, Kazan lama an siam niin khawvel huap pawha transport helicopter changkang ber zinga ngaih a ni.

Mamawhna ang zawng zawngin a hman theih niin an sawi a- sipai leh ralthuam phurhna tur atan te, fire support atan te, patrol neihna atan leh search-and-rescue (SAR) mission atana ṭangkai tak tura duan a ni.

A take-off weight chu kg 13,000 lai a ni a, sipai 36 thleng a phurh theih bakah bungrua kg 4,500 thlenga rit pawh khai zo tura ngaih a ni bawk.

250km/h-a chaka thlawk thei niin a pangngaiah chuan tanky full-in km 580 vel a thlawk thleng thei a, auxiliary fuel tank pahnih hmantir a nih phei chuan km 1065 thleng pawh a thlawk thei a, metre 6000-a sang a thlawk thei bawk.

Shturm-V missiles, S-8 rockets, 23mm machine gun, PKT machine guns, leh AKM sub-machine guns-te hmanga thuam a ni a, firing post pariat lai a awm nghe nghe a ni.