Forbes ; Khawvela hmeichhe thiltithei ber 'MacKenzie Scott'

Forbes magazine chuan Thawhlehni liam ta khan khawvela hmeichhe thiltithei zual 100 (The World's 100 Most Powerful Women) a thlan chhuah list a tichhuak a, American novelist leh philanthropist ni bawk MacKenzie Scott chu thil tithei berah an thlang.

US vice president ni mek Kamala Harris chu pahnihna a ni a, European Central Bank president ni mek Christine Lagarde chu pathumna a ni thung.

MacKenzie Scott chu...
Forbes-in khawvela hmeichhe thiltithei bera an thlan MacKenzie Scott hi chu tunge a nih kan hre furin a rinawm. Khawvela mi hausa ber, Amazon dintu Jeff Bezos-a nupui hlui kha niin kum 25 lai an inneih hnuah khum 2019 kum laihawlah an inṭhen a ni kha.

MacKenzie Scott hian Amazon-a share 25% lai a chang a, an inṭhen hnu lawkah khan Giving Plegde ziak nghalin a sum neih zawng zawng zahvel chu ṭanpui ngaite tan a hlan nghal dawn tih a lo sawi tawh a, nikum kumtir lamah khan ṭanpuitu pawl 500 vel lai hnenah $tluklehdingawn 5.8 zet sem ralin nikum vek June thla velah khan pawl 286 tan $tld 2.74 a pek leh thu a puang bawk.

Kum 51 mi Scott hian lehkhabu pahnih tichhuak tawh bawkin, tunah hian US-a hmeichhe hausa pathumna a ni mek a, khawvela mi hausa 21-na a ni bawk a ni.

Kamala Harris leh Christine Lagarde ve thung
Kamala Harris phei hi chu tu pawhin kan hre awm e. Kumin January thla khan khawvel ram ropui ber United States-a vice president hmeichhia ni thei hmasa ber a ni a, South Asian-American leh mihang zinga US VP ni thei hmasa ber a ni bawk.

Forbes hmeichhe thiltithei list-a pathumna Christine Lagarde hi European Central Bank-a hmeichhe president hmasa ber a ni a, Kum 2019 November thla aṭang khan he hna hi a chelh tawh a ni. Khawvelin hripui nasa taka a tuar laia European monetary policy a kalpui dan chuan fak a hlawh hle bawk a ni.

Rihanna, Beyoncé leh Taylor Swift pawh an lang
Forbes 'The World's 100 Most Powerful Women' list-ah hian zaithiam zingah Rihanna, Beyoncé leh Taylor Swift-te chu an lang a, Rihanna chu 68-na niin, Beyoncé chu 76-na niin Taylor Swift chu 78-na a ni ve bawk.

Forbes list-ah hian sumdawng lian leh politician an lang tam a, Indian finance minister Nirmala Sitharaman chu 37-na niin, Bangladesh prime minister Sheikh Hasina Wajed chu 43-na a ni thung. Queen Elizabeth II chu 70-naah a awm a, lemchan thiam Reese Witherspoon chu 74-na ni bawkin, tennis star Serena Williams chu 85-na a ni thung.