Nutei Thingpui Dawr-ah a chawlh theih ta

Mizo film thar, Zote Entertainment kut chhuak 'Nutei Thingpui Dawr' chu Ningani zanah khan Vanapa Hall-ah Lallianpuii, director I&PR-in a tlangzarh ta a, nizan aṭang khan Runmawi Apps lamah Rs. 200 chawiin a en theih ta.

'Nutei Thingpui Dawr' hi tlangzarh a nih zan hian 'premiere' ni nghalin, sawm bikte en theih turin chhawp chhuah a ni a, 'premiere'-naa kalte mit a tlai hle.

Mizote'n psychological horror/thriller film lam kan la ngah lem loa, chung film tlemte zinga mi chu niin a story kalphung a dangdai a, Mizote'na thawnthu kan la neih ngai zen zen loh lam hawi a ni daih mai. Chumi a nih avang chuan a thawnthu ziaktu Aaron Malsawmdawngzuala ngaihtuahna sen nasat tur zia a hriat.

Psychological horror/thriller film tiin film siamtu lamah a film genre sawi mai se, kalkhawmte beisei loh tak leh trailer lama an tihlan loh film siamtute'n thup an nei. Chu chu 'comedy' a ni. Trailer aṭang ringawt chuan film rapthlak tak a ni dawn emaw tih tur a ni a, mahse a film tir lam hun eng emaw chen chhung chu nuihzatthlak lam scene a tam mah zawk!

Film chanve hnulamah erawh nuihna tur a awm ta meuh loa, khunkhan takin, rilru hah takin film entute an awmtir leh thung si a, film siamtute themthiam zia hetah hian a hriat bakah beisei loh dan deuhin a tawp an khar thiam hle.

Script a ṭha thawkhat viau a, a changtute pawhin an chang thiam khawp mai. Achangtunu deuh ber Zuali Chhangte chevel a hmuhnawm a, Zorina leh midang pawhin lemchan an thiam a, lemchan lama kan la hmuh zen zen loh hmel thar, lemchan thiam tak tak kan hmu nual. A film an chan dan leh film kalhmang aṭangin director H Lalsangzela (Mike-a) leh a thawhpuite thawhrimzia hai rual a ni loa, fak an phu.

Chutih rual erawh chuan mi tam tak tan chuan a film a thui mah mah maithei. Darkar hnih leh a chanve vel zet ṭhut a ngai. Scene ṭhenkhat kha paih ui lo se chuan darkar khat leh a chanve aia rei hretah, film hmuhnawm tak min entir thei tho a rinawm. Audio leh video quality-ah duhthu sam zan lo lai a awm leh zeuh ṭhin tih lohah erawh he film hi sawiselna tur a tam loa, Rs. 200 chauh chawia en turah phei chuan film en manhla tak a ni.