MTV Video Music Award 2018 August 20-ah sem a ni dawn ; Darke, Cardi B leh The Carters te an langsar

Kum tina sem ṭhin MTV Video Music Award chu August 20 khian a vawi 35 nan Radio City Music Hall, New York City-ah sem a ni dawn. Award dawng thei tura chhawpchhuah te pawh puan an ni tawh a, Darke, Cardi B, Beyoncé leh JAY-Z te an langsar hle.

July 16 khan nominee hi puan a ni a, American rapper Cardi B chu category 10 zetah a hming a lang. Hetih lai hian 'The Carters' an tih mai Beyoncé leh JAY-Z te chu award pariat lai dawng thei dinhmunah an awm mek a, Drake leh Childish Gambino te chu award dawng thei turin category pasarih laiah an lang ve bawk.

Cardi B tan kum ṭha?

American rapper hi tun lai hmeichhe rapper zingah chuan thawm nei lian ber pawl a ni a, zaithiam dangte pawhin an thawhpui chak a ni. Cardi B hian tun hnaiah hla ṭha tak tak a nei nual a, MTV Video Music Award 2018-ah hian award a dawng nual a nih chuan a tan kum ṭha leh chinchhiah tlak tak a ni ngei ang.

MTV Video Music Award 2018-ah hian Artist of the Year dawng thei tur zingah a tel a, a khan ber te zinga mi a ni. Award ngaihlut hlawh tak tak - Video of the Year, Song of the Year, Best Collaboration leh Best Hip Hop te pawh hui thei turin a dinhmun a ṭha viau bawk.

Video of the Year-ah hian Bruno Mars nena an sak 'Finesse' chu a lang a, he hla hmang vek hian Best Collaboration huangah an lang bawk. Artsist ṭha ber ber thlan chhuah zingah Cardi B hming a lang hi thil mak a ni lo a, a awm hliah hliah zawk kan ti thei. He category-a lang te hi Ariana Grande, Camila Cabello, Drake leh Post Malone te an ni nawk a, a awlsam dawn lo.

The Carters

Beyoncé leh JAY-Z te hi zaithiam nupa zinga inkawp rem ber pawla sawi an ni ṭhin a, tun thleng pawhin a la dik hmel viau mai. An inneih hma pawha khawvel dengchhuak thei ve ve an ni a, nupa an nih hnuah pawh music khawvelah an la inhmang zui zel.

MTV Video Music Award sem turah pawh a langsar ber ber zingah an tel a, Best Colla­boration, Best Hip Hop leh Best Cinematography huangah te pawh chawpchhuah zingah an tel. Caterory pariat zeta award dawng thei tura chhawpchhuah an ni hi a namai lo hle a, chutih rual chuan award an hawn hnem leh hnem lohin an ropuina a belh chhah ang.

Drake ropuia

Canadian rapper Drake ropui zia hi inhrilh nawn a ngai fo a, chu chuan music khawvelah hmun pawimawh a chan zia a tilang chiang hle. Music kaihnawih a nih tawh chuan a hming hi hmaih thiang lo ang tluk zet a ni a, award pawh a dawng hnem ta malh malh hle.

Thla thar maia New York khawpuia sem leh tur MTV Video Music Award 2018-ah pawh mimala langsar ber pawl a ni a, award pawh a hum haw leh ngeiin a rinawm. Drake hian - Artist of the Year, Video with a Message, Best Direction leh category dang pali-ah nominee a ni.

Tun ṭumah hian zaithiam lar tak tak - Ed Sheeran, Justin Timberlake, Shawn Mendes, Taylor Swift, Avicii, Eminem, Kendrick Lamar leh Maroon 5 te pawh award dawng thei tura chawpchhuah zingah an tel.