Cody Carnes-in hla thar 'Firm Foundation (He Won’t)'

Worship leader lar tak, Pathian fakna hla ṭha tak tak phuahtu Cody Carnes chuan Zirtawpni khan hla thar 'Firm Foundation (He Won’t)' a tichhuak.

Gospel singer la, Dove awards eng emaw zat la tawhtu Kari Jobe-i pasal Cody Carnes hi kumin 'GMA Dove Award for Song of the Year' 'The Blessing' co-writer kha a ni a, kha hla kha a nupui Kari Jobe bakah Chris Brown leh Steven Furtick-te nena an phuah ho a ni.

Cody Carnes chuan a hla thar chungchang hi sawiin,"Hun khirh tak karah hian Matthaia bung 7-a Isua min zirtir kha hlaa ziah chhuah duhna lian tak ka nei a, chutah chuan, 'Ka thu ngaithlaa zawm apiang chu mifing lungpui chunga in sa ang a ni,' tih thu a inziak. Ruah a sur a, tui a lian a, thli a tleh a, mahse in chu tihchhiatin a awm lo, a chhan chu a innghahna lungpui a nih miau avangin. Khawvel pawh hi buai viau mah se Isua-ah in kan sa a, kan innghahna hi a rintlak tih kan hre thei a ni. Kan tlu ngai lo ang!," a ti.

'Firm Foundation (He Won’t)' hi streaming platform hrang hrangah ngaihthlak tur a awm a, Pathian fakna hla mawi leh ṭha tak a ni.

Cody Carnes hian tun hnaia Pathian fakna hla lar tak tak Hillsong Worship 'Hope of the Ages', Sean Curran 'Shake The Dust Off' leh Brandon Lake nena an tihchhuah 'Too Good To Not Believe' -te kha a phuahpui vek a ni.

Kum 2017-a Capitol Christian Music Group-in inremna an ziahpui hnu khan Cody Carnes hian studio album pahnih leh EP pahnih a tichhuak tawh a, Grammy nominee-te hial pawh a ni tawh bawk.