Miss Universe 2021 Harnaaz Sandhu

Miss Universe 2021 intihsiakna chu nimin zingah khan a hmawr bawk fel a ni ta a, Miss Universe India 2021 (Miss Diva) Harnaaz Sandhu chu Miss Universe 2021 atan thlan a ni.

Eilat, Israel-a Miss Universe vawi 70-na thlannaah hian Punjab nula kum 21 mi Harnaaz Sandhu hi Miss Universe 2020, Mexico Miss Andrea Meza chuan Miss Universe crown nimin zingah khan a hlan a, Paraguay Miss Nadia Ferreira chu 1st Runners-up a ni a, South Africa Miss Lalela Mswane chu 2nd Runners-up a ni thung.

Top three round-a an zawhna, 'Hmeichhe la naupang zawkte hnenah tun huna 'pressure' an neih ṭhin chungchang engtia hmachhawn turin nge i fuih ang?' tih chu Hernaaz chuan, "Tunlai huna ṭhalaite'n 'pressure' an tawh tam ber chu, anmahni inringtawk tura tihna hi a ni. I danglam bik a ni tih hriatna khan a timawi che. Midang nen in khaikhin tawh lo la, chu ai chuan khawvel puma thil pawimawh tam tak thleng chungchang sawi tawh zawk ang. Lo chhuak la, i tan ding chhuak rawh, a chhan chu i nuna hruaitu i ni miau a. Nangmah ngei kha i tana ding tur chu i ni. Keimah ka inringtawk a, chuvang chu a ni helai hmunah pawh hian ka lo din ni," tiin a chhang a, a hmuna kalte pawh an thawm a ring hle.

Harnaaz Sandhu chu...
October thla khan Harnaaz Sandhu hi Miss Universe India 2021-ah thlan a ni a, kum 2017-a Times Fresh Face aṭang khan beauty pageant lam hi a luhchilh ṭan a ni.

Amah hi Ft 5 leh inches 9-a sang a ni a, Femina Miss India Punjab 2019-te pawh lo ni tawhin Femina Miss India 2019-ah khan semi-finalist a ni bawk.

Chandigarh-a pianga sei lian niin Sikh chhungkuaa enkawl seilen a ni a, Shivalik Public School chhuak ni bawkin tunah hian Master Degree, Public Administration zirlai a ni a, Punjabi, Hindi leh English a thiam nal hle. Punjabi film eng emaw zatah a inlan tawh bawk a ni.

Harnaaz Sandhu hi India nula Miss Universe atana thlan pathumna a ni a, kum 1994 khan lemchan thiam lar tak Sushmita Sen chuan Miss Universe Crown hi a lo khum tawh a, Lara Dutta pawhin kum 2000 khan a lo khim tawh a ni.

Miss Universe 2021 hi
Fox Braodcasting Company leh Telemundo chuan an pe chhuak a, Steve Harvey chuan a host a ni. Ram hrang hrang 80 aiawh an tel a, Nigeria aiawh Maristella Okpala chu Best National Costume lawmman dawngtu a ni a, The Bahamas aiawh Chantel O'Brian chuan Spirit of Carnival Award dawng bawkin Chile aiawh Antonia Figueroa chuan Social Impact Award a dawng thung.

Colombia MissValeria Ayos leh Philippines Miss Beatrice Gomez-te chu top 5-ah an lang ve bawk.