Mood Station an che ṭha

Mizo Rock Band ṭha ber pawl 'Mood Station' te chu tunhnaia Jowai, Meghalaya-a buatsaih LADTHADABLOH FETE-ah an zuk che ṭha hle a, Jowai mipuite'n an lawm hle. Ticket 2000 an hralh zo vek a, midang 1000 lai hnawh belh an ngai hial.

Mood Station-te hi sawmna an hmuh angin December 8, 2021 khan Jowai FETE-ah an zuk inlan a, anmahni hla, Mizo irawm chhuak ngei bakah Mizo thuam tilang tur inbelin mipuite zawm theih tur hla chi hrang hrang hmangin kalkhawmte an awi a, mipui an ṭhap ṭha hle.

Vocalist/guitarist Vanlalhriatpuia Kawlni, bassist Rorempuia leh keyboardist Lalvenhima-te chevel Jowai mipuiin an lawm a, tun ṭumah hian an drummer hna lama a hman remchan loh avangin Suraj Sunar, Reverse Tragedy drummer chuan a pui thung.

Jowai Fete-ah hian Mizo zaimite sawm an ni fo tawh a, Covid-19 hri len vanga hun rei tak chawlh rih a nih hnuah hri leng a ziaawm tak hnua a hmasa ber atan Mood Station band-te hi Mizoram aṭanga zuk che leh hmasa ber an ni. Tunhmain The Breeze, The Keys leh Shai Hills-te chu Fete-ah hian an lo inlan tawh bawk.

Fete-ah hian an khaipa Mizo ngaina em em mai, Mizorama lehkha zir chhuak Pittchahnon Tongper-te chhungkua an fakawmin Mizo zaimite lo mikhual ṭhinin a thleng zo thei hle a, Jowai Fete-a zai tawhte a chungah an lawm ṭhin hle a ni.