'West Side Story'-in sum a lalut tam ber

Kar tawp liam ta chhung khan North America theatre hrang hrang aṭangin film thar 'West Side Story' chuan sum a lalut tam ber a, kar hnih chhung ro rel tawhtu 'Encanto' chu a nek chhuak. Box Office-a sum lengvak erawh a tam lo thung.

'West Side Story'
Musical romantic drama film 'West Side Story' hi $maktaduai 100 vel lai senga an siam a ni a, tun kar tawp liam ta chhung khan theatre 2,820 aṭangin $10,500,000 a lalut a, sum lalut tam ber a ni.

He film hi kum 1957-a mi daih tawh musical film-a an siam niin, street gang pawl pahhnih inhaw tak Jets leh Sharks-te inkar chungchang vel a ni a, kum 1961 khan film-in an lo tichhuak tawh bawk.

'The Fault in Our Stars' star Ansel Elgort chu achangtupa a ni a, Rachel Zegler, Ariana DeBose, David Alvarez, Mike Faist, leh Rita Moreno-te nen an chang ho a ni. Nikuma tlangzarh tura an ruahman tawh kha niin hrileng vangin Zirtawpni liam ta khan an tlangzarh thei ta chauh thung.

Director lar Steven Spielberg-a film a ni bawk a, hmuhnawm ngei tura ngaih a ni. Film review-tute pawhin an fak rawn a ni ber a, mi tam tak chuan kum 1961 film aiin a hmuhnawm zawkah an ngai. Rotten Tomatoes lamah mi 242 laiin an review-a, rating 8.30/10 lai a hmu a ni.

Chart-ah thil danglam tam a awm lo
Khawthlang ram ho hrileng vangin an fimkhur thar leh bawk nen, kar tawp liam ta khan Cinema Hall an hawng tam lo a, theatre 4000-a chhuah film pakhatmah a awm lo. Chuvang chuan kar dang aiin sum lengvak pawh a tlem hret.

Kar hmasa lama pakhatna 'Encanto' chu pahnihna a ni thung a, theatre 3,750 aṭangin $9,425,000 a lalut. 'Ghostbusters: Afterlife' chu theatre an chhuah tamna ber niin, theatre 3,815-ah an chhuah a, $7,100,000 lalutin pathumna a ni.

Chart-ah thil danglam tam a thleng lo a, 'West Side Story' a hmasa bera a rawn din avangin kar hmasaa mite kha pakhat ṭheuhin an tawlh kiang a tih theih a, kar hmasa lama palina 'Christmas with the Chosen: The Messengers' erawh pariatnaah a tla thla thung.

Film thar a tlem
Box Office Mojo chart-ah film 25 chiah tarlan a ni a, 'West Side Story' bakah hian 13-na 'National Champions' leh 18-na 'Red Rocket' chiah film thar a awm.

Box Office Top 10:-
1 West Side Story $10,500,000
2 Encanto $9,425,000
3 Ghostbusters: Afterlife $7,100,000
4 House of Gucci $4,060,749
5 Eternals $3,100,000
6 Resident Evil: Welcome to Raccoon City $1,650,000
7 Clifford the Big Red Dog $1,325,000
8 Christmas with the Chosen: The Messengers $1,290,000
9 Dune $857,000
10 Venom: Let There Be Carnage $850,000