Aquaman 2 an chang zo tawh

Jason Mamoa chuan social media kaltlangin 'Aquaman and the Lost Kingdom' an chang zo tawh tih a puangzar.

DC Extended Universe (DCEU) movie Aquaman chhunzawmna film chan zawh a nih tawh chungchang hi kum 42 mi lemchan thiam Mamoa chuan phur takin Aquaman 2 an chang zo fel tih a sawi a, mahni ina haw chu nuam a tih thu a sawi bawk. Mamoa hian Aquaman 2 hi a film chan dangte aiin a 'physical' zawk tih lo sawi tawhin film chan hahthlak tak a nih thu a lo sawi chhuak zeuh tawh a ni.

'Aquaman and the Lost Kingdom' hi December 16, 2022-a tlangzarh tur a ni a, Jason Momoa bakah hian Amber Heard leh Patrick Wilson-te pawh an inlan leh dawn a, 'The Expendables' star Dolph Lundgren pawh a inlan dawn bawk.