Linkin Park member ten an vocalist hlui Chester Bennington an sun

July 20 kha American rock band lar Linkin Park-a an vocalist ṭhin Chester Bennington-a thih cham vawi khatna a ni a, a band­mate-te chuan a sunna hun an hmang.

Chester Bennington hi an band khaipa zinga mi a ni a, nikum July 20 khan a chenna California-ah thia hmuh a ni. Kum 41 mi chauh a la nih avangin an band ngaisangtu leh amah ngainatute chuan an ui hle a, a thih thu pawh hian music khawvel a deng chhuak hneh hle a ni.

An band member - Mike Shinoda, Joe Hahn, Dave Farrell, Rob Bourdon leh Brad Delson te chuan Zirtawpni khan social media lamah Bennington an uina thu an tarlang. Instagram lamah chuan "To our brother Chester" tih an tarlang a, an bandmate hi an theihnghilh lo tih an lantir a, a kalsan tak a chungte pawh an tawrhpui tak zet tih an sawi.

"Vawiin (Zirtawpni) hi he khawvel i chhuahsan kum khatna a lo ni ta reng mai. Kan rilruah i cham reng a, i sulhnu tam tak hian i ropui zia a tarlang a ni," tiin an tarlang. Fans lam pawhin amah uina thu an sawi uar hle bawk.

I sulhnu chauh maw...
Chester Charles Bennington hi Palos Verdes Estates, Califor­nia-a a chenna inah inawkhluma hmuh a ni a, a hma pawhin a nunah buaina a lo nei fo tawh ṭhin niin an sawi. Kum 11 mi lek a nih laiin a nu leh pa an inṭhen a, ruihhlo bawiha a tang zui a ni. Hetianga nun harsa leh beidawng taka a awm vang hian mahni intihhlum pawh a tum fo ṭhin a, a tawpah chuan an dang zo ta lo a ni.

Chester Bennington hi alterna­tive leh metal khawvela band hlawhtling ber te zinga mi Linkin Park-a an frontman niin, kum 1999 - 2017 chhung khan sulhnu ropui eng emaw zat a hnutchhiah hman. Linkin Park lar zia inhrilh nawn a ngai lo a, chuta an vocalist chu Bennington hi niin, a sulhnu avangin music khawvelah a hming a dai tawh dawn lo a ni.

Music khawvelah
Bennington hian music a luhchilh hma hle a, Sean Dowdell and His Friends-ah telin, hei hi a bul ṭanna hmasa ber a ni. Kum 1993 khan hla pathum awmna cassette an tichhuak a, a hnuah post-grunge band, Grey Daze a zawm leh a ni. Album pawh pathum lai an record hman a, he band hi kum 1998 khan a chhuahsan leh a ni.

Linkin Park-in vocalist tur an zawn lai a ni a, kum 1999 khan American rock band lar hi a zawm ta a ni. Linkin Park tan hian sulhnu ropui tak tak a hnutchhiah hnem hle a, a tel hnu hian an band album hmasa ber 'Hybrid Theory’ an tichhuak nghe nghe a ni.

Linkin Park hma lam hun a chiang lo
Linkin Park co-founder Mike Shinoda chuan Bennington awm loh hnuah engtiangin nge an kal zui zel dawn a hriat loh thu a lo sawi tawh. Tun thleng chuan band angin an la perform leh meuh lo a, Linkin Park kan hmu zui zel dawn em a la chiang lo zel.

Shinoda chuan, "Engtianga kal zui zel tur nge tih tunah chuan kan sawi mai thei lo, band angin kan kal zui zel dawn em pawh kan la hre lo. Zawhna pawh kan dawng hnem hle a, mahse tunah chuan a chhanna a la awm rih lo," tiin a sawi.

Hetih rual hian member-te chuan band anga kalzui zel an duh thu an lo puang tawh a, a hlawhtling thei dawn em tih erawh hriat a ni rih lo. Hei hi fan-te tan chuan thu hriat nuam tak a ni hauh lo ang a, an inhui khawm thei tawh lo mai ang tih hlauhna a lian hle a ni.