Hontrade International Ṭhazual Lengzem ; Hlimhlimi 'Ṭhian Rinawm' aia rinawm an awm lo

Hlimhlimi-i'n ama irawm chhuak ngeia music video a tihchhuah "Ṭhian Rinawm' tih chu Hontrade International Ṭhazual Lengzem chart-ah No.1 a ni, kumina a vawi khat nan dinhmun sang ber a luah.

Ṭhazual Award 2017-a 'Best Female Artist' atana thlan H.Vanlalhlimpuii (Hlimhlimi) hian June 1 khan kumina a music video hmasa ber 'Ṭhian Rinawm' tih hi a tlangzarh a, thla hnih pawh a ral hmain pakhatna a hauh thei a ni. Chart hmasa lamah khan pahnihna a ni a, tun ṭumah erawh tuma tluk rual lohin dinhmun sang ber a luah ta a ni.

He hla hi sap hla aṭanga a lehlin a ni a, ama lehlin liau liau a nih avangin a irawm chhuak tih pawhin a sawi theih awm e. Hla ṭha tak niin, Ṭhian rinawm hlut zia tarlanna a ni.

Hlimhlimi chuan he hla chung­chang hi sawiin, "Hring­nun­ah chuan harsatna leh mang­an­na tawh chang a awm ṭhin a, chung hunah chuan ṭhian rinawm kan mamawh ṭhin. Kan harsatna lak atan min chan chhuak turin ṭhian rinawm kan mamawh a, chutiang mi chu an hlu tak zet a ni," a ti.

Armed Veng South nula chuan, amah ngei pawhin heting thil hi a lo tawn ve tawh thu sawiin, "He hla hian ka rilru a khawih tak zet a, midang pawhin an hlut ve ngei ka beisei a ni," a ti. Hlimhlimi hian Miss Mizoram 2018 Grand Finale zan khan he hla hi a lo sa tawh a, tunlai lengzem hla thlan hlawh ber a ni mek.

Tun ṭumah hian chart hmasa lama pakhatna David lalremruata chu pahnihna-ah a awm ve thung. A hla hit 'Jerusha' chu tunlai lengzem hla lar ber pawl a ni mek a, chart-ah pawh a lang zing ta hle. Dj Lalvenhimi chu 'A pawi emai' tih hla hmangin top 3-ah a in­hlangkai a, Sangkimi Khiangte pawh top 5-ah a hmel kan hmu bawk.

Sangkimi hian 'In tello chuan' tih hla hmangin a dinhmun a siam rem zel a, eng chen nge a thlen theih dawn hriat a chakawm tawh hle. Kawnpui nula Aziri pawh top 5-ah a lang a, a hla 'Hmangaihna' nen hma a sawn ve hret hret bawk.

Zemabawk nula Josephine Lalawmpuii chuan top 10-a lang phak hla pahnih - 'Ka tan ṭahna mai maw' tih leh 'Duhaisam Di' te a nei a, Marina V. Varte leh Tza Ralte chu top 10-ah a lang bawk.