Hla thar nen H. Vanlalhlana a inlar leh dawn ta

Hranghlui zaithiam, ṭhang­thar te pawhin a zai an la ngaihthlak kham theih loh H.Vanlalhlana chuan music video thar a nei leh ta.

Vanlalhlana hian mu­sic video pakhat mai a la duh tawk lo cheu a, a dang pawh siam belh zel a la tum. A hla thar tur te hi Lalṭanpuia To­chhawng hla phuah hnu­hnung ber 'Tawngtaina' tih te, K.Lalrammawia hla phuah ṭengzem hla hlui 'Chhingkhual Di' leh a dang eng emaw zat a peih fel tawh a ni. A hla te hi Zonet local channel lamah en tur a awm thuai dawn a ni.

'Hraite kal chhet chhet' tih hla hmanga Mizo mipuite min awi ṭhin­­tu H. Vanlalhlana hian music video album a tichhuak nual tawh a, record nei ṭha ber te zinga mi a ni. A music video album te hi - Zo lunglen, Mizo upa zai, Zo hnahthlak hrang hrang te hla tih leh The Best of H.Vanlalhlana tih te a tichhuak tawh a, hla 42 awmna Khawhar hla album a tichhuak tawh bawk.

Vanlalhlana hian rimawi khawvel chhuah­san mai a la tum lo a, a khat tawka video thar siam ve zel a tum thu, Vanglaini a hrilh bawk.