Bruce Lee thih danah Kung Fu legend te ngaih a ṭha thei lo!

Kum 1973, July 20 khan khaw­velin martial artist ropui a chan a, a hming chu Bruce Lee a ni. Kung Fu legend tam tak chuan Bruce Lee thih chhan nia an sawi thluak vûng chu an pawm thei lo a, tun thleng­in inhnialna a la chhuak fo a ni.

Bruce Lee hi a hming tak chu Lee Jun-fan a ni a, America-a piang niin, Hong Kong-ah a seilian thung. A thih hian kum 32 chauh a ni a, a lar vanglai tak a ni. A film chan tawh zinga lar ber pawl 'Enter the Dragon' chu a thih aṭanga ni ruknaah tihchhuah a ni a, a chanchin hian khawvel a dengchhuak hneh hle a ni.

A thih chhan a chiang lo

Bruce Lee hi thluak vûng vang­in a thi niin an sawi a, mi tam zawk pawm dan pawh a ni. A thih dawna a bula awm Taiwanese actress Betty Ting Pei chuan, "A thih hma lawkin a lu a nat thu a sawi a, Equagesic pill a rei hnu rei lo teah a chatthla zui a ni" a ti. Mahse hei pawh hi inhnialna titamtu mai a ni a, medical evidence a awm miau loh avangin inhnialna belhchhahtu mai a ni.

Cannabis vang maw?

Mi ṭhenkhat chuan Lee hi canna­bis vanga thi niin an sawi ve thung. A thih hnu pawh khan a taksa endik a ni a, a zunzam hmuh tur a awm niin an sawi. A chanchin ziaktu ṭhenkhat chuan stroke vanga thi niin an tarlang bawk. Hetih lai hian Hong Kong doctor te chuan cerebral oedema chu Kung Fu legend Bruce Lee thih chanah hian an pawm thung a ni.

Bruce Lee hi US-a piang ni mah se, a lu nghahna hmun erawh Hong Kong a ni. He hmunah hian Chinese martial artist lar Ip Man-a hnen aṭangin kung-fu pawh hi a zir a ni.

A dam lai khan film ṭhahnem tak a chang hman a, Asia-ah bik phei chuan a lar vet vet hle. A thih kum 1973-a tihchhuah 'Enter the Dragon' bakah, Fist of Fury, The Way of the Dragon leh kum 1978-a tlangzarh Game of Death te chu a lar zual an ni.