Electronic dance music festival lian Tomorrowland

'Tomorrowland' hi electronic dance music festival lian ber ti ila kan sawi sual awm lo e. Kum 2005 aṭang khan hman ṭan niin, music festival ropui leh ngaihven hlawh ber zinga mi a ni.

July 20 aṭang khan Provinciaal Recreatiedomein De Schorre, Boom, Belgium-ah ṭan a ni leh ta a, khawvel huapa DJ lar bakah, zaithiam hrawl tak tak an inlan. Chung zingah chuan English singer Dua Lipa leh Dutch DJ Armin van Buuren bakah, Martin Garrix te pawh an tel. Anni hian April 20-a boral Swedish DJ Avicii zahna an lantir a, fan te pawhin an zawm ṭha hle a ni. Tomorrowland hian July 29 thleng a awh dawn a ni.