Academy Awards 2021 Sem hun tur sawn

Oscar Awards 2021 chu kumdang aia tlaiah sem a ni dawn tih a chiang ta a, April 25-ah sem a ni ang.

Academy Awards producer-te chuan thla thum lai Hollywood shutdown a nih tak avangin nomination siam hun tur leh vote thlak hun tur zawng zawng pawh an sawn hla vek a, chumi vang chuan February 28-a sem tura an ruahman tawh pawh chu tikhawtlai lehin April 25-ah an sem dawn zawk ta a ni.

Academy of Motion Picture Arts & Sciences official-te chuan an museum thar pawh December-ah hawng loin nakkum April thla tawp lamah an hawng zawk dawn tih an puang bawk.

Oscar sem hun sawn hlat a nih tak avangin film nominate theih chin pawh thla hniha sawn hlat a ni a, hetiang a nih chuan nakkum January leh February-a tlangzarhte chu an la tel phak dawn a ni.

Preliminary voting chu nak­kum February 1-ah ṭan a ni dawn a, February 5 thleng hun hawn a ni dawn a, February thla tawpah chuan Oscar nomination pawh an puan hman beisei a ni bawk.