Adele bawk a langsar

Billboard chart ngaihven hlawh zual hoah Adele bawk a langsar leh a, Billboard 200 chart, Hot 100 chart leh Artist 100 chart-ahte pakhatna a ni leh vek.

Billboard 200 chart-ah Adele bawkin ro a la rel
Adele chuan a album thar ber '30' hmangin Billboard 200 chart-ah ro a rel leh a, a zawnin kar thum chhung he chart-ah hian pakhatna a ni tawh.

British singer hian MRC data aṭanga a lan dan chuan kar hmasa chhung khan a album thar hmang hian equivalent album unit 193,000 lai a hmu chhuak leh a, chuta ṭanga 149,000 lai chu album a hralhna aṭanga a hmuh chhuah a ni leh bawk.

Taylor Swift 'Red (Taylor's Version)' chu pahnihna niin, chart-a ro a lo relpui tawh album hmang hian EAU 80,000 a hmu chhuak. Pathumna chu Polo G album thar 'Hall of Fame' niin EAU 78,000 a hmu chhuak a ni.

Hot 100-ah 'Easy on me' bawk
Billboard Hot 100 chart-ah Adele bawkin ro a rel leh a, 'Easy on Me' chu pakhatna ni lehin he hla hian Hot 100 chart-ah hian kar sarih lai ro a rel tawh.

Krismas a hnai tawh bawk a, Mariah Carey 'All I Want for Christmas Is You' chu rawn langsar chho lehin Hot 100 chart-ah pahnihna a rawn ni ta a, karleh lamah phei chuan pakhatna pawh a ni hial tawh mai thei. Kum 1994-a tlangzarh daih tawh hla hi Masi thla a lo thlen apiangin US-ah chuan nasa takin a lar thar ṭhin a ni.

Pathumna pawh Krismas hla bawk niin kar hmasa lama palina Brenda Lee 'Rockin’ Around the Christmas Tree' kha a ni a, kar hmasa lama pahnihna The Kid LAROI ft. Justin Bieber 'Stay' chu palina a ni thung.

Artist 100 chart-ah
Artist 100 chart topper pawh tudang ni loin Adele bawk a ni a, Taylor Swift chu pahnihna niin Ed Sheeran chu pathumna a ni thung. Olivia Rodrigo leh Doja Cat chu palina leh pangana an ni ve bawk.