Mawitei Ralte-in Krismas hla tichhuak dawn

The Chosen Vocalist Mawitei Ralte chuan Krismas hla music video 'Aw Bethlehem engtin nge ni' a tichhuak dawn.

Mawitei music video thar tihchhuah tur hi a sap hla chuan mi tam takin kan hriat tawh a rinawm. Krismas hla lar tak 'O Little Town of Bethlehem' tih kha niin Dr Steven Lalsangliana Ralte-a'n Mizo ṭawnga thiam leh mawi taka a lehlin chu Mawitei hian sain music video a rawn tichhuak dawn a ni.

'Aw Bethlehem engtin nge ni' hi Apple Music leh streaming platform hrang hrangah a audio phei chu ngaihthlak theih turin Mawitei hian a chhawp chhuak tawh a, ngaihthlak a manhlaiin a sa mawi hle a ni. Mawitei zai ngainatute tan chuan ngaihven chi viau ang.

'Ka thlang ber zel ang che' tih hla thiam taka satu Mawitei Ralte hlate hi streaming platform hrang hrangah ngaihthlak tur a awm nual tawh a ni.

Mawitei music video thar tur hi Kevin Hangsing Videography kut chhuak a ni dawn a, hmuh a nuam viau turah beisei ang. Recording chu Blue Wave lamah a ti thung a, Zonet leh Mawitei YouTube channel lamah thlira ngaihthlak tur a awm thuai ang.