Krismas Urlawk 2021 hlawhtling takin nei

Synfo leh Central KṬP buatsaih 'Krismas Urlawk 2021' chu Thawhlehni zanah khan Golden Jubilee Hall, Mission Vengthlang Kohhran-ah hlawhtling takin neih a ni.

Kumin 'Krismas Urlawk' programme hi a vawi thumna ni tawhin a vawi khatna atan live-a pek chhuah a ni a, Hruaina Eng leh Synod Information YouTube channel lamah live-in an pe chhuak a, in lam aṭanga thlirtu pawh an ṭhahnem hle tih a hriat.

Johny Ramthansanga, Bethlehem North Branch chuan programme kaihruaiin tunlai Gospel singer ṭha ber ber- Jerry Lalrinawma, Lalrinzuala (Amtea), Melody Lalzirliani leh Lawmi Khiangte-te bakah One in Christ-te an inlan a ni.

Rev K Lalrinmawia, Executive Secretary incharge Synfo & CKṬP chuan programme ṭantirh lamah Krismas thuchah ṭha tak sawiin, chumi zawhah chuan zaithiamte an inlan ṭan a, zaithiam tak takte an inlan bakah hian Ramthar Veng Branch-ten Faklam mit titlai tak an entir a ni. Rev Vanlalmuanpuia Khiangte, CKṬP Leader pawhin Krismas thuchah ṭha tak a sawi bawk.

Zaithiamte zai leh thusawi karah hian kalkhawmte chuan zaihona hun hlimawm tak an hmang reng bawk a ni.

Upa Rochungnunga, General Secy, CKṬP chuan lawmthu sawina hun hmangin banna pawh a siam nghal a ni.

'Krismas Urlawk' programme-a house band-te kha KTP, Mission Vengthlang Branch mem-ber-te an ni a, Praise Group member-te pawh kha Mission Vengthlang Bial chhunga mite an ni bawk.