'Wonder Woman 1984' October-ah

Gal Gadot channa 'Wonder Woman 1984' chu August 14-a tlangzarh a nih dawn thu puang tawh mah se October-a tlangzarh tura sawn hlat a ni leh ta zawk a, hetihlai hian Christopher Nolan film sawi hlawh tak 'Tenet' chu beisei aia hmain tlangzarh a ni dawn a, July 31-ah tlangzarh a ni dawn thung.

'Wonder Woman 1984' siamtute chuan August 14-ah an film hi tlangzarh an tum vek tawh a, mahse Christopher Nolan film chanchin ngah tak hi July 31-ah tlangzarh tum a ni ta si a, Wonder Woman zawk hi an tawlh hla leh ta a ni.

Christopher Nolan film siam hi a hlawhtlin ṭhin em avang leh huhang nei ngah tak a nih ṭhin avangin  'Wonder Woman 1984' siamtu lam chuan kar hnih chhung chauha an tlangzarh hun tur a inthlau tur hi an ngaingam ngang lo niin a lang. 

'Tenet' hi Covid-19 vanga US shutdown a nih hnua film tihchhuah leh tur langsar hmasa ber a ni a, tlangzarh a nih hma hauh aṭang hian ngaihven a hlawh tawh hle.

Hetihlai hian  Rus­sell Crowe film thar 'Unhinged' chu July 1-a tlangzarh tum mah se July 10-a tlangzarh turin an sawn leh ta zawk a, Angelina Jolie produce tur 'The One and Only Ivan' pawh theatre-ah chhuah a ni leh dawn lo a,  Disney+ streaming service-ah tihchhuah a ni thung ang.