Mizo Idol 2018 ; Zanin aṭangin Champhai-ah audition ṭan dawn Mi 56-in intihsiak hmachhawn dawn

Zonet buatsaih Mizo Idol season 6 chu zanin aṭang hian ṭan a ni dawn ta a, District audition hmasa ber hi Champhai-ah neih a ni ang. Audition-a tel tur hian mi 56-in hming an pe tawh a, zaninah mi 25 an inlan dawn a ni.

Champhai-ah hian audition hi zan hnih neih tura ruahman a ni a, CCN Studio aṭanga live tur a ni ang. Zan dar 8:00 aṭangin ṭan tur a ni dawn a, Zonet Zawlbuk-ah live-a pekchhuah a ni ang. Zanin inlan bak te hi July 26, Nilaini zan hian an inlan ve leh dawn a ni.

Audition hi Distirct hrang hrangah neih a ni dawn a, Serchhip nula Lancy Rem­lalhruaii chuan a host ṭhin dawn a ni. Champhai-ah zawh fel a nih hnu hian Serchhip-ah neih ve leh a ni dawn a, July 28 aṭangin ṭan a ni ang. Mizo Idol 2015-a top 50 tling tawh te chu audition round paltlang sa an ni.

Judge tur te
District audition-ah hian judge hran zel an awm dawn a, rimawi lama sulhnu nei ṭha tak tak te an ṭhu dawn. Champhai-ah bik hian CD Ngurkunga, Jerome Hauzel leh Lalrammawii te chuan endik hna hi an thawk dawn a ni. Audition hi August thla chhunga zawh hman tura ruahman niin, a tawpna chu August 8 aṭangin Aizawl District-ah neih a ni ang.

Champhai Audition-a judge tur te :

1. CD Ngurkunga

2. Jerome Hauzel

3. Lalrammawii