Jurassic World: Dominion July-ah chan chhunzawm dawn Covid-19 laka himna atan $mtd 5 an hmag tawh
Jurassic World chhunzawmna Jurassic World: Dominion chu UK-a film lian, coronavirus vanga kharkhip hnua production chhunzawm leh hmasak ber a ni dawn a, July kar hnihnaah hi chuan shooting an nei
ṭan leh tawh dawn.
UK sorkar lamin film chan lam khuahkhirhna thla hmasa lama an thlahdul hnu khan film studio lam chuan hma an la chak hlawm hle a, Tom Cruise pawh Mission: Impossible VII chang turin UK lam hi a pan tawh nia tarlan a lo ni tawh bawk.
Deadline-in an tarlan dan chuan Jurassic World director Colin Trevorrow chu Pinewood Studios, Buckinghamshire-a film production nei leh hmasa ber tur a ni a, mahse UK sorkarin kaihhruaina dan a siam erawh an zawm a ngai dawn thung.
Universal production senior executive pakhat pawhin hemi chungchang hi an sawi chiang tawh niin Deadline chuan a tarlang a, July thla laihawla bul an
ṭan dawn thu hi a sawi.
Hri leng kara film
chan a hautak
Film studio lam thuneitute chuan safety protocol-ah ringawt pawh $maktaduai 5 lai an hmang tawh a, film changturte bakah crew leh production team-a tel zawng zawng pawh hri an kai leh kai loh test vek an ngaih avangin production chhunzawm leh hma hauh pawhin sum an seng hnem tawh hle. Doctor leh nurse bakah isolation booth-te pawh an buatsaih lawk vek a ngai a ni.
Universal production executive chuan natna symptoms nei chu rang taka khung hran an ni dawn tih leh thawn haw thuai an nih dawn thu a sawi a, sorkarin zawm tur a siamte chu ṭha taka an zawm dawn thu leh himna chu an ngaihpawimawh ber a nih thu a sawi a ni.
"Kan medical team-te thurawn angin kan kal dawn a, mahse ṭha takin production tihkhawtlai tawh chu kan chhunzawm ngei theih kan beisei a ni," a ti.
Jurassic World: Dominion-ah hian Chris Pratt leh Bryce Dallas Howard-te chu an chang leh ngei dawn a, UK lam hi an pan thuai rin a ni a, ni 14 an inkhunghran leh phawt hnuah shooting hi an ṭan ang.
Kar 20 chhung vel production an kalpui tawh hnuah hripui leng vangin March thla laihawlah khan tiam chin awm loin production chawlhsan lailawk rih a nih thu an puang a ni.