Billboard Pop Airplay chart-ah LISA

Billboard Pop Airplay chart-a K-pop solo act hmeichhe zinga lang hmasa ber chu Blackpink Lisa a ni.

Blackpink rapper Lisa chuan Billbord history-a siam tlat mai!

Thawhlehni, December 14 khan Billboard-in tunkar atana chart thar an tihchhuahah Lisa hi an Pop Airplay chart-ah a hming a lang a, 40-na a ni. Billboard Pop Airplay chart-ah hian K-pop solo artist hmeichhia lang an la awm ngai loa, Lisa hi lang hmasa ber a ni ta.

Billboard hian United States-a mainstream radio lian zual 40-a an hla play nasat zual chart hi kartin an tichhuak ṭhin a, kar hmasa chhung khan Lisa solo B-side 'Money' chu an hla play tam 40-na a ni a, he hla hmang hian Lisa hian K-pop solo act hmeichhe dangin an la dai ngai loh ram a dai ta a ni.

K-pop solo act hrim hrimah chuan a hmasa ber a ni lo thung a, PSY khan a hla hit 'Gangnam Style' hmang khan he chart-ah hian awmhmun a lo khuar daih tawh a, chumi hnuah chuan K-pop super group BTS member 'Suga' pawh khan he chart hi a lo rap ve leh tawh a ni. Chumai bakah chuan nikum lamah khan Selena Gomez an thawhpuina 'Ice Cream' hmang khan Blackpink ang chuan he chart-ah hian an lo lang tawh bawk.

Lisa hla hit 'Money' hian Billboard chart lamah lawm a hlawh hrim hrim a, Billboard Global 200 leh Global Excl. U.S. chart-ahte pawh K-pop soloist zinga hla lang rei thei ber record a lo siampui tawh a, chu chu tunah pawh hian la pawhsei belhin he chart-ah hian kar 13 chhung lai a lang tawh.

Lalisa Manobal hian September 10 khan a solo album hmasa ber 'Lalisa' a tichhuak a, he album hi South Korea-a Gaon Album Chart lamah chuan No.1 a nihpui hial a ni. November thla tawp lamah khan Lisa hian Covid-19 a kai tih hriat chhuah a ni a, December thla tir lamah khan YG Entertainment lam chuan thuchhuah siamin a dam fel leh tawh thu an sawi a ni.