Bruce Springsteen-in a catalogue zawng zawng Sony hnenah a hralh

Bruce Springsteen chuan David Bowie, Bob Dylan leh Stevie Nicks-te hnungzuiin a music catalogue zawng zawng a hralh niin khawthlang lam media-te chuan an tarlang.

Grammy award eng emaw zat dawng tawhtu Bruce Springsteen hian a masters leh music publishing rights-te chu Sony Music hnenah $ maktaduai 500 velin a hralh niin Billboard chuan an tarlang.

Billboard hian an thudawnna nen an tarlang thlap a, hei hi a dik a nih chuan rock legend hla lo tihchhuah tawh zawng zawng chu Sony ta hi a ni tawh dawn a, chung zingah chuan vawi 15 lai platinum-a puan tawh a hit album 'Born in the USA' leh vawi nga platinum-a puan tawh 'The River'-te pawh a tel.

Springsteen hi artist zinga a catalogue zawng zawng hralh hmasa ber erawh a ni lo. September thla khan David Bowie chuan Warner Music hnenah a lo hralh tawh a, Bob Dylan pawhin kum khat vel liam taah khan a hla zawng zawng, hla 600 chuang zet chu Universal Music Group hnenah $mtd 300-in a lo hralh tawh bawk a ni.