The Rolling Stones Kumin chhunga tour-na aṭanga sum lalut tam ber

English Rock band chuai thei lo The Rolling Stones chu kumin chhunga tour-na aṭanga sum lalut tam ber an ni tih PollStar chuan a tarlang.

Kan hre ṭheuh a, kumin chhungin hrileng vangin live show a tam lo hle. Satisfaction' hitmaker The Rolling Stones-te pawh hian kumin chhungin 'No Filter' tour an nei a, stadium show vawi 12 chiah neih hman mah se £maktaduai 87.2 lai an lalut a, anni aia sum lalut tam an awm lo.

One Direction star Harry Styles chuan dawtin 'Love On Tour' a neihah vawi 30 show neiin £mtd 65.5 a lalut thung. 'Watermelon Sugar' hi kumin chhunga ticket hralh hnem ber a ni a, fans 669,051 vel hmaah kumin chhungin a inlan niin an tarlang.

Green Day, Fall Out Boy leh Weezer-te chuan dawtin £mtd 50.8 vel ṭheuh an lalut angin PollStar chuan an chhut. Eagles chu sum lalut tam palina niin £mtd 44.7 vel an lalut angin an chhut a, John Mayer telna band Dead & Company chu pangana niin £mtd 37.9 vel an lalut ve bawk a ni.

Tour-na aṭanga sum lalut tam ber nia an tarlan The Rolling Stones hian August thla khan an drummer Charlie Watts chu an chan a, Watts hi kum 80 mi niin a thi a ni. Mahse thla hmasa lawk khan Sir Mick Jagger chuan nakkum lamah chuan tour chhunzawm leh theih an inrin thu a lo sawi tawh a, tunah chuan Keith Richards leh Ronnie Wood nen, an pathum chiahin awm tawh rih mah se nakkum lamah chuan tour chhunzawm leh an tum zel tho a nih hmel.