Sonic 3 an sawi ri leh der tawh

'Sonic The Hedgehog 2' director Jeff Fowler chuan 'Sonic' 3 chungchang a sawi ri leh nghal tawh a, Robotnik lema Jim Carrey inlan leh tur chu fan-te'n an lawm dawn tih a chian thu a sawi bawk.

Jeff Fowler chuan Sonic 3 siam turin ngaihtuahna leh idea pawh ṭha tak tak a nei sa reng tawh tih a sawi a, hun remchang an pe leh a nih ngat chuan siam tura a inpeih thu a sawi.

Collider-in an kawmnaah hemi chungchang hi sawiin Sonic 3 chungchang ngaihtuah loh chu a tan chuan thil har tak a nih zawk thu a sawi a ni.

Sonic 2-a Robotnik lema Jim Carrey chang leh tur pawh fan-te'n an lawmin an ngaina dawn tih a chian thu sawiin, film hmasa ang bawkin a chhunzawmnaah chuan a chevel a hmuhnawl leh hle dawn a ni, a ti.

Sonic The Hedgehog 2' trailer hi Zirtawpni liam ta khan tihchhuah a ni tawh a, nakkum April 8-ah an tlangzarh dawn a ni.