Ruihhlo vanga talbuai Demi Lovato Overdose vangin hospital-ah dahluh a ni

Pop singer Demi Lovato chu Thawhlehni khan nikhaw hre loa a awm hmuh a ni a, Los Angeles hospital-ah dahluh ngal a ni. Endik a nih hnuah heroin overdose tih hriat chhuah a ni a, uluk taka enkawl zui nghal a ni.

Los Angeles Police Depart­ment chuan chawhma dar 11:30 vela phone call an dawn thu sawiin, hmeichhe pakhat nikhaw hre loa awm chu an va hmu ta tih an sawi. Demi hi Laurel View, Hollywood Hills-ah hmuh a ni a, a lo awmna hi a chenna a ni lo tih an tarlang.

American singer Demi hi ruihhlo avangin a lo buai fo tawh a, sawiselna pawh a tawk fo a ni. Thawhlehni zan khan American television show lar Beat Shazam-ah inlan tur a ni a, mahse The X Factor star hi hemi ni hian nikhaw hre loa a awm hmuh a ni ta zawk a ni.

Malin a awm lo
Ruihhlo avanga Demi Lova­to talbuai hi a zaithiampuite chuan an lainat hle a, ṭha leh thuai turin duhsakna an hlan. Lady Gaga, Ariana Grande, Brad Paisley leh Shawn Mendes te chuan a chunga thil thleng chu pawi an tih thu an sawi a, ṭha chhuak leh thuai turin duhsakna an hlan. Ellen DeGeneres pawhin a hnampui chunga thil thleng chuan a rilru a tihreawm tak zet tih sawiin, a lainat hle tih a tarlang ve bawk.

A ṭhian hnai tak Nick Jonas pawhin Demi chanchin lungchhiat tak hian a ṭhawng tak zet tih a sawi a, a ṭhat chuah leh thuai a beisei tih social media lamah a tarlang a ni.