'Enter the Dragon' film a chhuak leh dawn?

July 20 kha khawvela martial artist ropui ber te zinga mi Bruce Lee thihchampha ṭum 45-na a ni a, a chanchinin ngaihven a hlawh thar leh hle. Hetiang a nih mek lai hian American film director lar David Leitch chuan Bruce Lee channa 'Enter the Dragon' film kha siam thar leh tumin hma a la mek niin, khawthlang media te chuan an tarlang.

Deadpool 2 film siamtu David Leitch chuan, "Film khawvelah Kung fu a lar zet a, mipui hmuh chak pawh a ni. Ṭhangthar tam takin Bruce Lee ropui zia chiang zawka hmuh an duh a, chumi tihlawhtling tur chuan hma lak a ngai a ni," a ti. Bruce Lee channa 'Enter the Dragon' siamṭha leh tur hian ngaihtuahna a seng mek tih sawiin, a thih cham aṭang khan chu rilru chu a pu ṭan tih a sawi.

Kung fu legend Bruce Lee hi kum 1973, July 20 khan a thi a, a thi aṭanga ni ruknaah 'Enter the Dragon' hi tlangzarh a ni.