Mizo Film Award 2021 Zaninah Vanapa Hall-ah sem a ni dawn ta

Mipuite'n beiseina sang tak nena an thlir Mizo Film Award chu zanin dar 8:00 hian Vanapa Hall-ah sem a ni dawn ta - Mizo film industry-a hriat hlawh ber berte an fuankhawm dawn.

A hun a thleng dawn ta
Mizo Film Award 2021 atan inbuatsaihna ngawrh taka kalpui a ni a, tunah chuan engkim peih a ni tawh. Zan dar 7:00 aṭangin Red Carpet ṭan a ni ang a, Zoram hmun hrang hrang aṭanga kal khawm film star-te an inlan ang. Zaithiam, designer leh kawng hrang hranga mi hriat hlawh ber berte an inlan dawn bawk.

Angelina & Esther Colney
Mizo Film Award hi host pahnihin an kaihruai dawn a, red carpet-ah Esther Colney a ding dawn a, tun laia host lar em em Angelina Paul a la awm cheu bawk. Angelina hi award ceremony kaihruaitu tur a ni dawn thung.

Designer kutchhuak
Award sem leh event lian dangah designer-te an pawimawh ṭhin a, tun ṭumah pawh nominee ṭhenkhatte'n designer kut chhuak an inbel dawn. Designer hriat hlawh tak tak - Tluangpuii Hmar, Escape Engmawia leh Buanga Chhangte-te kutchhuak an inbel dawn a ni.

Zaithiamte'n OST sa dawn
Mit leh beng titlaitu ber tur pakhat chu zaithiamte'n film OST an sa tur hi a ni. Zorema Khiangte chuan 'Grace' OST a sa dawn a, a hla pawh mipui hriat lar tak 'Saltang Ṭawngtaina' a ni. Hlimhlimi'n 'Thingtlang Tlangval' OST 'Ṭhian Rinawm' a sa dawn bawk. Anni bakah hian midang zai tur pawh an awm nual.

Tlau Entertainment buatsaih Mizo Film Award 2021 hi Zonet leh LPS-ah live a ni dawn a, YK Official YouTube channel-ah live-a pekchhuah a ni bawk ang.