'Queen of Instagram' Selena Gomez khumtu Kylie Jenner-i'n sum lalut hnem ber
Reality TV star Kylie Jenner chuan 'Queen of Instagram' an tih mai Selena Gomez chu khumin, Instagram aṭanga sum lalut hnem ber dinhmun a luah. Hetih lai hian Selena Gomez chu follower ngah ber a ni zui zel thung.
Milar te hian sponsor post aṭangin sum an lalut ber a, an lakluh pawh a tam tham hle. American model Kylie Jenner hian vawi khat post aṭangin $mtd 1 zel lalut anga chhut a ni. Keeping Up with the Kardashians star hian follower maktaduai 111 zet a nei a, IG- aṭang ringawt pawh hian hausakpui lawih tham sum a lalut a ni.
Follower ngah ber Selena Gomez chu sum lalut tam pahnihna a ni a, post pakhat aṭangin $800,000 zel lalut anga chhut a ni. Selena hian follower maktaduai 137 zet a nei a, a ni aia zuitu ngah an awm lo. Kum 2017 khan sum lalut hnem ber dinhmun hi a lo luah tawh a, kuminah erawh Kylie Jenner a tluk ta lo a ni.
Follower 114 nei mek Kim Kardashian chu sum lalut tam palina a ni a, Beyonce Knowles chuan a dawt a ni. Film star zinga sum lalut hnem ber chu WWE superstar hlui Dwayne 'The Rock' Johnson a ni. American actor hian a larna chu chawrṭangkaiin post pakhat a siamah $650,000 zel a lalut thei a ni.
Canadian singer lar Justin Bieber chuan pasarihna a hauh pha ṭawk a, IG lamah beisei angin a tlana lo. Hetih lai hian Taylor Swift pawh top 10-ah a lang pha lo a, milar tak tak lang pha lo an awm nual bawk. Follower maktaduai 93 lai nei American model Kendall Jenner chu sumlalut tam zual zingah a lang phak thung.
Footballer inlarna!
IG aṭanga sum lalut hnem zual top 10-ah hian footballer pathum an lang footballer zingah Cristiano Ronaldo chuan a lalut hnem ber. Portugal captain hian post pakhat aṭangin $750,000 zel a lalut a, pathumna a hauh phak hial. IG-ah hian follower maktaduai 137 zet a nei a, Selena Gomez chiah tluk loh a nei a ni.
Brazillian superstar Neymar da Silva Santos Junior chu sumlalut tam pariatna a ni a, Barcelona star Lionel Messi chuan a dawt a ni. Neymar hian post pakhat a siamah $600,000 zel a lalut a, Messi chuan $500,000 zel a lalut ve bawk.
Beckham magic
A kalna lam a pianga hlawhtlinna chang ṭhin David Beckham chu British zingah a chungnung ber a, sum lalut hnem ber leh follower ngah ber a ni. A hun laia footballer lar ber pawl Beckham hian post pakhat aṭangin $300,000 zel a lalut a, follower pawh maktaduai 49 zet a nei a ni. Beckham hi a nupui Victoria Beckham pawhin a tluk lo a, zaithiam lar Ed Sheeran leh mi lar tak tak chungah a leng a ni.
Footballer Gareth Bale chuan Beckham hi a hnaih ber a, Zoe Sugg, Rosie Huntington-Whiteley leh Jamie Oliver te chu sum lalut tam zual zingah an tel bawk.
Sum lalut hnem (per post) Top 10
1. Kylie Jenner : $1m (111m follower)
2. Selena Gomez : $800,000 (139m follower)
3. Cristiano Ronaldo : $750,000 (137m follower)
4. Kim Kardashian West : $720,000 (114m follower)
5. Beyonce Knowles : $700,000 (116m follower)
6. Dwayne Johnson : $650,000 (111m follower)
7. Justin Bieber : $630,000 (101m follower)
8. Neymar Santos Junior : $600,000 (100m follower)
9. Lionel Messi : $500,000 (97m follower)
10. Kendall Jenner : $500,000 (93m follower)