Mizo Film Award 2021 sem a ni ta; Best Actress- Rosangpuii Ralte

Tlau Entertainment buatsaih Mizo Film Award 2021 chu Inrinni zanah khan Vanapa Hall-ah sem a ni ta a, nomination puan a nih aṭanga boruak nei lian tawh 'Dengi I love You' chu che ṭha berin award pali lai a la. Award ngaihhlut Best Actor award latu chu Papuia Pachuau a ni a, Rosangpuii Ralte chu Best Actress a ni thung.

Dengi a langsar
'Dengi I love You' chuan award pali lai a la a, award dawng tam ber a ni. 'Dengi I love You'-a lem chan thiam tak mai K. Vanlalawmpuia chu Best Supporting Actor atan thlan a ni a, Best Supporting Actress dawngtu pawh a chanpui Melissa Lalmuansangi tho a ni bawk.

Best Cinematographer-ah pawh Ngaihawma Fanai, 'Dengi I Love You' hlawhtlin theihna atana lungphum pawimawh chu thlan a ni a, film award sem reng renga ngaihhlut hlawh ber pawl ni ṭhin Best Picture pawh 'Dengi I Love You' bawkin a dawng.

'Thingtlang Tlangval'-in award pahnih

'Thingtlang Tlangval' star, Mizo film industry-a sulhnu ṭha tak hnutchhiah tawhtu Rosangpuii Ralte chu Best Actress-ah thlan a ni a, he film screen writer Malsawma Lailung chu Best Screenwriter-ah thlan ni bawkin 'Thingtlang Tlangval' film hian award pahnih lai a dawng a ni.

Award dawngtu dangte chu
Mizo lemchan khawvela hming langsar tak, Papuia Pachuau chuan 'Hnehtu' film-a thiam taka a chan avangin Best Actor award a dawng.

Best Director award chu tudang ni loin 'Nunna Thar' film director Mapuia Chongthu-in a dawng. Mizo film industry-a mi pawimawh Mapuia'n he award a dawng hi a phu kan ti ṭheuhin a rinawm.

Best Short Film award chu 'Last Wish' in a dawng thung a ni.

Award sem zanah khan
Zaithiam pawh eng emaw zat an inlan a, Adama leh Sangtei Renza-te chuan boruak an siam thiam hle. Anni bakah hian zaithiam lar tak tak- Zorema Khiangte, Hlimhlimi, Arini, Kimkima leh Siampuii Ralte te an zai bawk a ni.

Mizo Film Award ceremony hi LPS leh Zonet bakah, YK Official YouTube channel-ahte live-a pek chhuah a ni a, mipuiin an hlutin entu pawh an ṭhahnem hle.

MIZO FILM AWARD 2021 WINNER
• Best Actor - Papuia Pachuau (Hnehtu)
• Best Acctress - Rosangpuii Ralte (Thingtlang Tlangval)
• Best Supporting Actor - K. Vanlalawmpuia (Dengi I Love You)
• Best Supporting Actress - Melissa Lalmuansangi (Dengi I Love You)
• Best Director - Mapuia Chongthu (Nunna Thar)
• Best Cinematographer - Ngaihawma Fanai (Dengi I Love You)
• Best Screenwriter - Malsawma Lailung (Thingtlang Tlangval)
• Best Picture - Dengi I Love You!
• Best Short Film - Last Wish