Liando Auto Works-in an kum 50 tlin an lawm

Mizorama automobile workshop upa ber ni mek Liando Auto Works chuan Dcember 18, Inrinni khan Hotel Regency-ah an kum 50 (Golden Jubilee) tlin an lawm.

Liando Auto Works founder R Tlangmingthanga chuan automobile engineer a zir chhan ber chu Mizo nationalism a nih thu sawiin, "Mizorama motor zawng zawng siam leh enkawl chu hnam dang kut veka awm a ni ṭhin kha veiawm ka ti ṭhin hle. Mizo ngeiin motor siam kan thiam ve a, Mizorama motor awmte enkawl leh siamte kan thiam ve a duh avangin automobile engineer ka zir a, ka zir zawh veleh workshop ka din nghal a ni," a ti.

Inkhawm kaihruaitu proprietor David R. Lalsawmtluanga chuan Pathian ring tak zet chunga an kal thu leh Pathian an rin tlat avanga he hun hi thleng thei an nih thu a sawi a, kum 50 chhunga anmahni dawrtute zawng zawng hnenah lawmthu sawiin, anmahni dawrtute rilru an tih natnaah ngaihdam an dil.

Liando Auto Works hian Golden Jubilee pualin thilpek chi hrang hrang an sem chhuak a, driver senior Lalhmangaihzuala chu a khalh lai SK 407 an pek bakah hnathawktu senior ber leh thawktu upa ber hnenah thilpek an hlan bawk.