Facebook-in sum hloh hnem US stock market-ah record an siam!

Facebook-in hmingchhiatna hrang hrang an tawh chu an tuar zui zel a, tunhnai khan ni khat thil thuah company hlutna hi $tld 119 zetin a tlahniam niin an sawi. Hei hian company CEO Mark Zuckerberg hausakna pawh nasa takin a nghawng bawk a ni.

Tun hnai khan Facebook hlutna hi ni khat thil thuah $tld 119 zetin a tlahniam a, US stock market-ah record chhe ber an siam hial a ni. Facebook share price hi 19% zetin a tlahniam a, company a din a china an chet chhiat ber lai an tawng mek a ni. An hlutna tlakhniamna ringawt pawh hi McDonald's, Nike leh IBM te market value nen a inzat thuak a ni. Facebook chief executive officer Mark Zuckerberg hausakna $tld 67 chu $tld 15 zelah a tlahniam niin an tarlang bawk.

BBC chuan Facebook-Cambridge Analytica data scandal hian mi tluklehdingawn 1.1 vel a ngawng niin a tarlang a, ram hrang hrangah ngawng a nei lian hle. US chu a tuar nasa ber ram niin, mi maktaduai 78 vel a nghawng a, Philippines, Indonesia, UK, Mexico, Canada, India, Brazil, Vietnam leh Australia-te chu a tuar nasa zual zingah an tel. Company chuan fimkhur thu hlaah fake account maktaduai 583 zet an titawp thu an lo puang tawh bawk a ni.

Ni khat thil thleng

Khawvel ram ropui ber US-ah khuan ni khat thil thua hlutna hloh nasa tak tak company eng emaw zat an lo awm tawh. Kum 2000 khan Wall Street chu ni khat lekah $tld 90 zetin an hlutna a lo tlahniam tawh a, company pawhin harsatna a tawh nasat phah hle. Hemi kum vek hian Microsoft chuan mit khap kar loah $tld 80 zet an hloh bawk a, Intel chu he harsatna lo hmachawn tawh zingah hian an tel bawk.

Heng zawng zawng hi Facebook hian rawn khumin ni khat thil thuah $tld 119 zetin an hlutna a tlahniam a, US history-ah chuan a lian ber a la ni.

A bul fuk tak chu

London Observer leh The New York Times-te chuan kum March 17 khan UK-a data firm Cambridge Analytica chuan personal information tam tak an lakhawm tih an tarlang a, hei hi tuna an tlakchhiat chhan hi niin a ngaih theih. Chutih rual chuan khawvela social media lian ber Facebook hi an tlachhe ta duai e tihna erawh a ni lo tih hriat a ṭha awm e.

Cambridge Analytica avang hian privacy leh security setting a him tawk lo nia ngaihna a lian hle a, data leh information a putru ṭhin nia tarlan chungchangah hian company lam hi vawi tam tak an lo insawifiah tawh a ni. A nghawng hi a len em avangin vawi leh khata chinfel mai chi a ni lo a, hei hi company pawh hian a tawrh phah zel niin a lang.

Facebook chief Mark Zuckerberg chuan an company a din a china hun kirh ber an hmachhawn thu a lo sawi tawh a, chingfel tura theihtawp an chhuah thu a sawi bawk.