Mystical Mizoram Ṭhazual Lengzem ; Zaii Hauchhum û Liandova'n ro a rel

21st December, 2021

Mystical Mizoram Ṭhazual Lengzem chart-ah Zaii Hauchhum chuan a hla mawi tak 'Ka u Liandova' hmangin ro a rel a, Shin Bia leh Nunui-te chu pahnihna leh pathumna an ni bawk.

'Ka u Liandova' chu
Ṭhazual Award 2021 sem hma lawk khan Zaii Hauchhum hian a u puala a hla phuah mawi tak mai 'Ka u Liandova' a tichhuak a, Ṭhazual Award semnaah a hnua sawi laih laih tur khawpa performance hmuhnawm min entir pahin he hla hi a rawn sa leh. A tihchhuah aṭanga thla hnih vel a liam meuh chuan Ṭhazual chart-ah pawh topper a rawn ni ta.

Zaii chuan,"He hla hi ka u Sentea hriatrengna tura ka phuah a ni. Liandova te unau thawnthuah khan kan unau chanchin hi a inzep vea hriatna ka neih avangin he hla hi ka rawn phuah chhuak a ni," tiin he hla chungchang hi Vanglaini a lo hrilh tawh. Ṭhazual Award zana live-a a sak chhuah aṭang khan he hla hi a rilru chhungrila thil awm a phawrhna hla a ni tih hmuh hmaih theih a ni lo.

'Ka u Liandova' official music video kha nuai thum chuangin YouTube lamah an thlir tawh a, lyric video leh live-a a sakna pawh khan thlirtu nuai hnih chuang fe mai a nei ve ve tawh bawk. He hla hi Zofate'n kan ngaithla nasa tih a chiang a, pakhatna a ni pawh hi mak ti kan awm a rinawm loh.

Shin Bia 'Khuavang note' kha
Tunah chuan Ṭhazual chart lamah pahihna a ni der tawh. Chart hmasa lamah khan pangana a ni a, tunah chuan pahnihna a ni der tawh. YouTube lamah thlirtu a ngah chak bawk a, dinhmun ṭha taka a rawn inhlangkai pawh hi a awm viau.

Chart a hot, hla ṭha a tam
Lalhmangaihzuali (Nunui) 'Nangnen chuan' chu top 3-ah a rawn inhlangkai ve leh ta bawk a, a dinhmun a ṭha sawt hle. Palina chu Jenny Jathang niin 'Ka thawnthu' hmang khan dinhmun sang zawk a pan zel a, Kimkima chuan 'Hmangaihna rimawi' hmangin top 5 a khar thung a ni.

Rebecca Lallawmsangi 'Zingkawng' pawhin a thleng thui telh telh a, parukna a ni tawh. Asawmi Khiangte & Darev ft Fuse 'Lenglerhlengi' chu pasarihna niin Sangpuii Hlondo, Siampuii Ralte leh Latei Hringngen-te chu pariatna, pakuana leh 10-na an ni bawk.