Theatrical Play Zaninah Ênna a lo thleng dawn e

Zanin dar 8:00 hian Central KṬP buatsaih Krismas drama 'Ênna a lo thleng ta' tih chu Chaltlang Kohhran Hall-ah chan a ni ang a, LIVE-a tihchhuah tur niin, LPS 1, Zonet Zawlbuk leh Central KṬP YouTube channel-ah te pek chhuah a ni ang. He drama hi Central KṬP buatsaiha theatrical play show hmasa ber tur a ni.

'Ênna a lo thleng ta' drama hi darkar khat vel awh tur a ni ang a, Broadway musical te nena kalphung inang tur a ni. Zaithiam kan hriat lar tak takte pawh he drama-ah hian hmuh tur an awm dawn. LPS Youth Icon 2008 aṭanga Zoram khawvelin kan hriat lar ṭan, 'Luiral ram mawi' hmanga Mizo mipuite min awi ṭhintu Mali (Vanlalmalsawmi Sailo) Chaltlang te, Zo rimawi khawvela kan hriat lar sa Lawmi Khiangte te, Zonet Ṭhazual Faknaa pakhatna pawh lo luah tawh ṭhin Nunui (Lalremsiami) te, Dawrpui Vengthar Acapella aṭanga kan hriat Lalfamkima te, Mizo Idol aṭanga kan hmelhriat Andrew K. Lalchhandama, Bawngkawn Bethel leh Chanmari Veng zaithiam Isaac Lalhruaitluanga te a tel tur zinga mi an ni. Mizoram Synod Choir an inlan bawk ang.

A changtute hi Dawrpui Bial KṬP te, Venghlui Branch, Venghnuai Branch, Chaltlang Branch leh Ramhlun Sports Complex Branch te an ni a. Choreographer hi Steve-a, Republic leh Nutei, Fit-In Dance Studio, Laipuitlang neitute an ni. Music Organiser hi Chama, Music Inn leh Forte Studio neitu, Harhna Ropui music video hmanga kan hriat lar Tetea te an ni.

'Ênna a lo thleng ta' theatrical play script hi tunlai ṭhalai zinga thuziak thiam F. Vanlalrochana a ni a, director hi zai lama kan hriat lar Dr. Zoa a ni.

Theatrical play hi zanin dar 8:00 hian ṭan a ni ang a, hruaitu tur hi Tv. K. Lalchhanhima, CKṬP Comt. Member a ni ang a, drama inbuatsaih dan vel hi Tv. Malsawmdawngliana, CKṬP Comt Member-in a sawi ang a, Rev. Vanlalmuanpuia Khiangte, CKṬP Leader-in hunserh a hmang. Hemi hnu hian Drama hi tihchhuah a ni dawn a ni.