A hmei a pa thliar lohna - Brit Awards 2022 nomination a chhuak ta

Brit Awards 2022 nomination chu puanzar a ni ta a, a hmaa an lo puanzar lawk tawh angin mipa leh hmeichhe category hrang a awm tawh loa, category khatah mipa leh hmeichhe hming a inpawlh nawk tawh a ni.

Nomination hmu tam zualte chu
British Phonographic Industry (BPI)-in kumtina an buatsaih ṭhin Brit Awards 2022 nomination list-ah hian hming langsar pali an awm a, chungte chu- Adele, Ed Sheeran, Dave leh Little Simz-te an ni a, nomination pali ṭheuh an hmu.

Anni pali hi Album of the year leh Artist of the Year category-ah an hming a lang vek nghe nghe a, chuvang chuan huang ngaihnawm zual tur chu a chiang mai awm e.

Hming langzar dang
Coldplay chu Group of the Year leh Best Rock/Alternative Artist-ahte an hming a lang a, Brit Awards bika ngaihven hlawh ṭhin International Artist of the Year category pawh a ngaihnawm leh dawn. He huangah hian Billie Eilish, Doja Cat, Lil Nas X, Olivia Rodrigo leh Taylor Swift-te hming a lang a ni.

Dua Lipa pawh hmun hnihah a hming a lang a, Elton John nena an tihchhuah dun 'Cold Heart' chu Song of the Year nominee a nih bakah Best Pop/R&B Act category-ah a hming a lang bawk.

Brit Awards 2022 hi
Nakkum February 8-ah O2 Arena, London-ah an sem dawn a, British comedian Mo Gilligan chuan a host ang. Brit Awards vawi 41-na tur a ni tawh bawk.

Nomination list-ah hian mipa aiin hmeichhe hming a lang tam zawk a, kum 10 chhung vela hetiang thil a thlen vawi khatna hi a ni hial. Anne-Marie, Glass Animals, Mimi Webb leh Joel Corry & Gracey-te chu inlan tura tihchian tawhte an ni.