India mite'n TikTok an 'bye bye' a ngai rih ta

India leh China inkar boruak ṭhat loh avangin India sorkar chuan China mobile application 59 lai mai India ramah a 'ban' a, heng zingah hian tunlai ṭhalaite'n an game khelh uar em em Mobile Legend leh tunlaia khawvela application lar TikTok chu India ramah hman theih a ni ta lo.

TikTok bik hi mi tam takin an hlimpui a, Mizo-te pawh kan bang bik lo. Ṭhalai leh kan naupangte'n he application hi an hlimpuiin an tleipui hle. Mi tam takin intihhlimna mai atana an hman lai hian ṭhenkhat chuan sum hmuhna atan an hmang - chumi zinga langsar chu Adeline Pachuau hi a ni. Tuaisiala hla 'Suangtuahna neitu' a model zei tak mai Adeline hi TikTok 'star' a tling.

Musica.ly a nih lai aṭangin Adeline-i a lo lar tawh, Mizote'n kan la hre lo 

TikTok hi a tirah TikTok a ni lo - Musica.ly tih a ni ṭhin. Musica.ly hunlai aṭangin Adeline-i hian a hmang ṭangkai tawh a, India rama livestream spotlight tura an thlan mi panga zingah pawh a lo tel hial tawh. Spotlight artist-a thlan a nih hunlai hian nitin darkar khat tal a live a ngai ṭhin, chung chu kum 2017, Musica.ly a nih lai kha a ni daih mai.

English-a a ṭawng ṭhin bik avangin Indian dangte aiin bengkhawn a hlawh zual a, UK leh US lam aṭangin follower a nei ṭan ta. Chu a live chu zan khat a viral ta a, chu mi avang chuan zan khat thil thuah mi sing thum chuangin an follow nghal a, mahse chung hunlai chuan Mizo follow-tu a la nei mang tlat lo a, India ramah pawh hriat a la hlawh lo.

Mahse vanneihnain a umzui zel a, a video ho chu an feature tak foah chuan follower a neih belh zel a, tun dinhmun hi a thleng ta a ni. Lam leh lipsync ringawt a buaipui ve lo a, video tran­sition lam a uar avangin glo­bal feature a neih phah a, transition bikah phei chuan India rama feature hmasa pathum zingah a tel tih Vanglaini a hrilh.

A tirah chuan nuam a tih avangin Musica.ly apps hi a hmang a, mahse email lamah an hlate hmang tura ngenna a dawng ta fo a, a tam ber chu sap ram lam aṭangin a ni lehnghal. Sum lakluhna atan a ṭangkai dawn tih hre lo mah se chung mite ngenna chu a tihhlawhtlin sak ṭhin. Hun a kal zel a, a lar zel a, contract-te an ziahpui ta hial a, a beisei loh deuhin sum lakluhna hnar ṭangkai tak a lo ni ta a ni.

TikTok hian an kal dan phung an thlak a, monetise an kalpui tak hnuah pawh Adeline hi a la tel phak zel. Monetise account nei tur hian follower 500k tal neih a ngaih bakah kar khatah post like 100k tal neih a ngai a, chung zingah chuan a la tel pha cheu. Hetia India leh China boruak avanga India rama TikTok tawp ta hi a ui ve hle.

Adeline Pachuau chuan a hming lo chher tawhna TikTok tawp ta rih chu a ui hle tih Vanglaini a hrilh. Amah tak chuan khawih tam lutuk tawh lo mah se Mizo Tiktoker eng emaw zat rawn hmang ṭangkai chho mek an awm a, a hlawkna an tel ve tak tak hmaa tihtawp a ni ta chu a uipui hle tih a sawi.

YouTube lamah pawh Adeline-i hian lawm a hlawh viau tho a, subscriber 66.8k lai a nei leh tawh. TikTok lama a chevel la hmu kham lo chuan YouTube lamah umzui mai chi a nih hmel. 

-    Khawvel puma Musical.ly sportlight Artist 20 vel thlan chhuah zingah a tel tawh.

-    India rama spotlight artist panga thlan chhuah zingah a tel.

-    Video transition feature India rama hmang hmasa ber pawl a ni.

-    India rama verified account nei hmasa ber pawl a ni bawk.

-    Follower 716.9k a nei hman.

-    BBC pawhin social media a hman ṭangkai vangin an lo kawm hial tawh.

Sorkarin TikTok hman a khap tak siah chuan a aiah Bolo Indya, Mitron leh Roposo app-te chu hman mai a ngai rih dawn a nih hmel. Video tawi siamna Bolo Indya app hi Play store-ah download theih a ni a, tunah hian mi 1,00,000 chuangin an dowload tawh a ni. TikTok el thei ber tura siam Mitron app hi Play store-a dah a nih hnuah paih leh a ni a, TikTok tih tawp a nih tak siah chuan he app hi download theih a dah chhuah leh a ni. Download tu pawh mi vaibelchhe khat an chuang tawh a ni. Roposo app hmang mek hi mi 50,000,000 chuang an awm a, Play store leh Apple store-ahte download theih a ni. ZEE5 mobile app chuan TikTok el theih tur video tawi siamna app chu tun thla hian peih fel hman an tum.