Tour aṭanga sum lalut hnem ber - Taylor Swift

Billboard Hot Tour chart thar berah American singer Taylor Swift chu sum lalut hnem ber a ni a, July 17-22 chhung khan $mtd 27 chuang zet a lalut. Hetih lai hian country singer Kenny Chesney chu pahnihna niin, $mtd 5 a lalut a ni.

'Dedicated' singer Swift hian Reputation Stadium Tour a nei mek a, US khawpui hrangah hrangah concert a nei mek. July 17 khan Cleveland, FirstEnergy Stadium-ah a concert a, ticket 51,323 hralhna aṭangin $mtd 5 a lalut. July 20-22 chhung khan MetLife Stadium, New Jersey-ah a zawnin zan thum a concert leh a, ticket 165,654 zet a hralh aṭangin $mtd 22 chuang a lalut a ni.

Taylor Swift hian tun hnaia ṭum li concert a neihah hian ticket a hralh zo vek zel a, sum pawh a thawk chhuak tam hle a ni. New Jersey-a a concert hi English singer Charli XCX leh American-Cuban singer Camila Cabello te chuan an ṭawiawm a ni.

Chesney a la tar lo
American country singer lar Kenny Chesney hi kum 50 mi lai ni ve tawh mah se, music khawvelah erawh a 'hit' ber te zinga mi a la ni. Kenny hian Trip Around the Sun Tour a neih mek aṭangin sum a thawk chhuak nual tawh a, a concert chhimtu pawh an ṭhahnem ṭhin hle.

Tun hnai khan BankPlus Amphitheater, Mississippi leh St. Louis’ Busch Stadium-ah te show neiin, ticket hralhna aṭangin $mtd 5 zet a lalut a ni. Chesney hian kumin April thla aṭang khan tour hi a neiṭan a, $mtd 75 zet a lalut tawh a ni.

Justin Timberlake chuan $mtd 3.9 lalutin pathumna a hauh a, Tim McGraw & Faith Hill bakah, Queen, Adam Lambert leh Sam Smith te chu top 10-ah an lang ve bawk.