Omicron dan zawh loh 'Spider-Man: No Way Home'
'Spider-Man: No Way Home' chu tlangzarh a ni ta, i awih lo zawk ang, kartawp vawi khatah kumin chhunga North America Box Office-a sum lalut tam ber a ni nghal dèr!
An sawi 'Spider-Man: No Way Home' chu Zirtawpni liam taah khan US-ah tlangzarh a ni a, rin lawk leh beisei lawk ai fein a che ṭha a, Covid-19 chi thar Omicron pawh an hlau zo loa, hrileng kara hun hmang lo ang maiin Spider-Man en turin mipuiin Cinema Hall lam an pan a ni.
'Spider-Man: No Way Home' sum lakluh zat a tam lutuk
Kar hmasa lamah kha chuan Box Office-a sum lengvak nasa takin a tlahniam a, chart topper pawhin $maktaduai 10 a lalut tling thei ṭawk a nih kha. Mipuiin Coronavirus chi thar Omicron an ṭih avangin Cinema Hall lam an pan ṭha duh lo. Mahse, chutiang karah chuan Zirtawpni liam taah khan tlangzarh hma aṭanga thawm nei ring 'Spider-Man: No Way Home' chu an tlangzarh ta a, hrilengin 'Spider-Man' film thar an en chakna kha a dang zo lo a ni ber.
Kar tawp liam ta chhung khan Theatre 4,336-ah he film hi an chhuah a, $260,138,569 a lalut hem mai. Kumin chhunga US-a film sum lalut tam ber a ni nghal!
Film tlangzarh thar turin sum a lakluh tur zat lo chhut lawk ṭhinte chuan 'Spider-Man: No Way Home' hian US-ah khuan tlangzarh kar tawpah $mtd 130 - 150 vel a lakluh phak an ring ṭawk a, mahse an beiseina chu nasa takin a rawn khum a ni. Tlangzarh ni, Zirtawpniah ringawt pawh khan $mtd 121 a lalut hman. Tom Holland-a channa Spider-Man film hmasa ber Homecoming khan tlangzarh kar tawpah $mtd 117 a lalut a, Far From Home khan $mtd 92.6 lalut bawkin No Way Home erawh nasa takin a rawn invawrh ta a ni.
MCU Spider-Man 3 hi kumin chhunga film sum lalut tam parukna a ni nghal a, khawvela film awm tawh zawng zawng zinga tlangzarh kar tawpa sum lalut tam pathumna a ni nghal bawk ■
Chutichuan 'Spider-Man: No Way Home' chu eng dinhmunah nge a din tâk?
Tom Holland, Zendaya leh Benedict Cumberbatch-te channa film hian khawvel ram hrang hrang aṭangin $600,938,569 lai sum a lalut tawh a, tlangzarh a nih aṭanga kar khat em pawh a liam hmain kumin chhunga film sum lalut tam parukna a ni nghal der mai.
'Avengers: Endgame' leh 'Avengers: Infinity War' tih lohah chuan tlangzarh kar tawpa sum lalut tam ber a ni nghal bawk.
Critics lamin he film hi an fak rem rem hle a, Rotten Tomatoes lamah chuan rating 7.9/10 a hmu a ni.
'Spider-Man' leh 'Encanto' sum lakluh a inthlau
'Encanto' chu sum lalut tam pahnihna niin theatre 3,525-ah chhuah a ni a, $6,483,152 a lalut. 'Spider-Man: No Way Home' nen an sum lakluh a inthlau hle a, khaikhin chi pawh a ni lo hial.
Kar hmasa lama pakhatna West Side Story chu pathumna ni thungin $3,657,197 a lalut a ni.
Film thar
Kar hmasa khan film tlangzarh thar a awm ve nual. Nightmare Alley (5), Pushpa: The Rise - Part 1 (7), Schemes in Antiques (20) leh The Novice (26) te chu film thar an ni bawk.
Spider-Man 4 an buaipui leh nghal?
Marvel Studio boss Kevin Feige chuan Spider-Man film dang pakhat tal chu siam an tum leh tih a sawi.
Producer Amy Pascal pawhin Spider-Man 3 tlangzarh a nih hma khan hemi chungchang hi a lo sawi chhuak zeuh tawh a, tunah chuan Kevin Feige pawhin a rawn sawi chhuak ve leh ta. "Amy leh kei bakah Disney leh Sony-te chuan kan sawiho tawh a, ni e, a chhunzawmna chuan eng lam nge a hawi dawn tih kan buaipui ṭan leh tawh," tiin a sawi a ni.