US-ah mei zu an tlem tial tial
US-a Management consulting company pakat Gallup chuan tun hnai khan an ramin meizial zu zat tlem ber ṭum an tawng niin a tarlang.
Report aṭanga a ln dan chuan 16% chauhin meizial an zu a, hei hi kum 1944 hnua a tlem ber ṭum a ni. Kum 1944 kha chuan mei zu hi 44% zet an awm a, 1970 vel kha chuan mi 10 zela pali zelin an la zu a ni. Hei hi zawi zawin a tlahniam a, 1977-ah chuan 36% chiah an ni tawh.
Kum 1989 a her chhuah meuh chuan 30% aiin a hniam tawh a, 2013-ah phei chuan 20% chiah a ni tawh. Zir channa hnuhnung berah chuan 16% chauh mei zu an awm tawh a ni. Meizial zu tam ber hi kum 12-29 inkar an ni a, hei pawh hi nasa takin a tlahniam tawh a ni.
World Health Organization (WHO) in a tarlan an chuan khawvel pumah meizial zu tluklehdingawn khat vel an awm a, chu chu khawvel mihring awm zawng zawng aṭanga 20% vel a ni. Mei zuk avang hian minute khatah mi 10 zel thi angin an chhut bawk!
China chu meizu tamna ber ram niin, a mi cheng tld 1.3 zinga mtd 315 vel zetin an zu a ni. Khawvela cigarette awm zawng zawng aṭanga 3% chu China hian a chaw lut a ni. Indonesia chu mei zu tamna ram a ni bawk a, mipa kum 15 chin chunglam 76% zetin an zu a ni.