World Most Admired People 2018 ; Bollywood star zingah hmeichhia an chungnung
YouGov chuan kum tina an tih chhuah ṭhin World Most Admired People list chu an tichhuak leh ta a, Bollywood star pali an lang. Chung zingah chuan mipa pakhat Amitabh Bachchan chauh a tel a, hmeichhia an chungnung zawk.
World Most Admired People 2018-ah hian Bollywood star Priyanka Chopra, Deepika Padukone, Aishwarya Rai leh Amitabh Bachchan te chu a vawi khat nan an lang a ni. Hollywood thlenga hriat hlawh chho Priyanka Chopra leh Deepika Padukone te an langsang a, a ber nihna erawh an hauh phak lo. Aishwarya Rai leh Amitabh te pawh mipuiin an duh leh lawm ber zingah an tel a, dah hniam theih an ni lo.
Amitabh hian mipa bikah pakuana a hauh phak a, Deepika Padukone leh Aishwarya Rai chu te 11-na an ni. Priyanka Chopra chu 10-na niin, Wonder Woman star Gal Gadot aiin duhtu a ngah zawk a ni.
Ṭum dang ang bawkin mipa lamah chuan Amrican sumdawng hausa Bill Gates chuan dinhmun sang ber a luah a, a zawna ṭum li a hauhna a ni tawh. Hmeichhe amah chuan Angelina Jolie chu mipui duh leh lawm ber a ni a, a ni pawh hian kum 2015 aṭang khan dinhmun sang ber a la luah char char a ni.
U.K-a hmunpui nei YouGov chuan ram 35-ah online interview hmangin survey hi an nei a ni. Ram hruaitu zingah US president hlui Barack Obama, China president Xi Jinping leh India prime minister Narendra Modi te pawh an lang a ni.