Billboard chart hrang hrangah Krismas rim a nam

Krismas a hnai zel a, Inrinni hi chuan Lal pian champha kan lawm tawh dawn. Khawthlang ram ropui United States lam pawh Masi boruakin a chiah hneh tawh bawk a, tunah chuan kumtina Krismas dawna hla 'hit' thar ziah ṭhin Mariah Carey 'All I Want For Christmas Is You' chu Billboard chart lamah pawh a langsar leh tawh rem rem hle.

Hot 100-ah Masi hla an che ṭha ta
Krismas kar a ni ta bawk a, Billboard Hot 100 chart lamah Krismas hla an rawn inlar nasa leh tawh hle.

Mariah Carey 'All I Want For Christmas Is You' chu Hot 100-ah rinlawk ang ngeiin pakhatna a ni leh ta a, Krismas dawna he hla lar thar ziah chungchang chu kan hriat tawh hlawm kha. Global 200 chart lamah pawh he hla hian ro a rel a, US-a kar hmasa chhunga an hla stream tam ber pawh he hla hi a ni.

Hot 100 chart-a pahnihna pawh Masi hla bawk niin kar hmasa lama pathumna Brenda Lee 'Rockin' Around The Christmas Tree' chu pahnihna ani a, pathumna chu Adele 'Easy on Me' kha ani thung. Bobby Helms 'Jingle Bell Rock' chu palina a ni a, Burl Ives 'A Holly Jolly Christmas' chu pangana a ni bawk.

Wham! 'Last Christmas' pawh chart top 10-ah a rawn inhlangkai ve leh ta a, kar hmasa lamah khan 13-na ni mah se tunah chuan pakuana a ni tawh. Krismas boruak a reh hnuah erawh heng hla tam tak hi chu an bo leh duak dawn tih a chiang.

Billboard 200 lamah erawh Adele '30' bawk
Adele studio album palina '30' bawkin Billboard 200 chart-ah ro a rel leh a, a zawnin kar li chhung ro a rel tawh. Record ropui tak tak a siampuina album '30' hmang hian Adele hian Billboard 200 chart lamah hian a tihchhuah aṭang khan ro a la rel char char a, ram 26 laia he album hi chart topper a nihpui nghe nghe.

Juice WRLD 'Fighting Demons' chu pahnihna a ni thung a, Taylor Swift 'Red(Taylor's Version' chu pathumna niin Michael Buble 'Christmas' chu palina a ni a, Olivia Rodrigo 'Sour' pawh top 5-ah a la inham tang ve bawk a ni.

Artist 100-ah pawh Adele
Artist 100 chart lamah pawh Adele pawhin chart a la thunun a, Jucie WRLD leh Taylor Swift chu pahnihna leh pathumna an ni bawk.

Krismas hla avanga tunhnaia rawn lar thar leh pahnih Michael Buble leh Mariah Carey chu top 10-ah rawn lang ve leh bawkin parukna leh pariatna an ni.