Coffee Nite 2021; Live Show-a hman a ni dawn

Kum tina Krismas Urlawk zan, December 24 zana Salvation Army Youth, Aizawl Temple Corps-te'n an buatsaih ṭhin Coffee Nite chu hripui leng vangin kumdang angin Temple Square-ah hman theih a ni dawn lo a, chuvang chuan Aizawl Temple YP Hall-ah hman tur a ni dawn a, Live Show turin buatsaih a ni.

Kuminah tute nge inlan dawn?
Kum dang ang bawkin zaithiam inlan turte an ṭha leh dawn a, zaithiam 15 lai inlan tura tihchian an ni tawh.

Tunlaia Gospel singer ṭha ber ber- Maruati Hnamte, Hlimhlimi, Jaui, Jonathan Lianhna, Zorema Khiangte, PBK Liankhuma, leh PC Hriati-te an inlan dawn a, Lengzem lamah pawh sawm hlawh ber ber- Benjamin Sum, Sangtei Khuptong, Rebecca Lallawmsangi, Siampuii Ralte leh Rinhlui Tlumang-te chu inlan tura chiang tawhte an ni.

MGT winner Rindika Zadeng a inlan dawn bawk a, mit leh beng a tlai dawn. Gospel Duo tunlaia hit ber pawl Bena & Jerry an inlan dawn bawk. Chumai a la ni lo, Ṭhazual Award aṭanga an zai thiam zia kan hriat tawh, Aengi & Rosalyn-te an la awm cheu. Mc Fyn band te an inlan dawn bawk. Mit leh beng a tlai leh dawn tih a chiang.

Heng bakah hian Mizo Dance Camp leh Supreme te an inlan dawn bawk a ni.

Chuti chuan...
Lalruatkima, Hon’ble Minister of State chu Father of the Nite a ni dawn. Kumin Coffee Nite aṭanga sum hmuh chhuahte chu Covid-19 relief atan hman a ni dawn a, show neih chhungin Gpay hmanga donation thawh theihna siam a ni ang.

Entia en tur nge ni ta?
A hmunah mipui punkhawm theih a nih dawn loh avangin mahni in lum aṭangin en a ngai dawn.LPS, Zonet leh Doordarshan-te chuan live-in an pe chhuak dawn a, YouTube lamah pawh live-a pek chhuah a ni dawn bawk.

Zan dar 9 aṭangin programme ṭan a ni dawn a, hlawhtling taka hun hman a nih theihna turin hun eng emaw chen chhung chu SAY, Aizawl Temple Corps-te leh zaithiamte hi an inbuatsaih tawh a ni.