Kum 2025-ah Coldplay in an music hnuhnung ber tur tichhuak dawn

Coldplay frontman, Chris Martin chuan kum 2025-ah an band anga music an siam hnuhnung ber tur chu tihchhuah an tum niin a sawi.

Hei hi BBC Radio 2-a Jo Whiley-a'n a kawmnaah a sawi a ni.

Kum 44 mi Chris Martin chuan, "Record pangngai anga a hnuhnung ber chu 2025-ah tihchhuah a ni ang a, hemi hnu chuan tour chauh kan nei tawh ang," a ti. Midangte nen an la thawkho leh mai thei a, mahse Coldplay ang chuan a tawpna tur a nih thu a sawi a ni.

An band album hmasa ber, Parachutes chu kum 2000 khan tihchhuah a ni a, 'Yellow' chu an larpui nghal a ni. An album tihchhuahte pawh platinum an kai pha zel a, grammy nomination pawh 30 zet an hmu bawk. October thla khan an studio album pakuana, Music of the Spheres chu an tichhuak a, hetah hian Selena Gomez, We Are King, Jacob Collier leh BTS-te an thawhpui a ni.

November thla khan BTS nen American Music Awards-ah 'My Universe' chu an lo perform ho tawh a, December thla tir lam khan The Voice-ah an inlan leh bawk. Nakkumah international tour neih an tum a, hei hi kum 2016 leh 2017-a A Head Full of Dreamd Tour an neih hnuah international tour an neih leh hmasa ber tur a ni.