Vulmawi member Hmingliana a boral

Vulmawi member Hmingliana chu nimin khan Agape Hospital, Tahan, Myanmar-ah a kum 68 mi niin a thi.

1970's leh 80's chhoa Mizo band lar tak ṭhin Vulmawi band hming hi chu hre lo kan awm awm lo e. Chutah chuan Hmingliana hi an member pawimawh tak a ni a, Mizo rimawi khawvela sulsutu pawimawh niin audio cassette siam hmasa ber pawh an ni nghe nghe. Kum 1976 khan an album hmasa ber 'Raldawna leh Tumchhingi' chu an tichhuak a, he album hi Mizo audio cassette hmasa ber nia ngaih a ni.

Vulmawi band hian kum 2016 khan ropui takin Tahan, Myanmar-ah an kum 40 tlin pawh an lo lawm tawh nghe nghe a, vawiin thlenga hla lar tak tak- 'Sawiselbovi', 'Maphasy' leh 'Tawnmang' te hi an hla a ni a, heng bakah hian hla lar tak tak eng emaw zat an tichhuak.

Hmingliana hi Wesleyan Vengpui Biak inah Kohhran Secretary a ni mek a, nak lawkna pawh nei loin nimin zing ṭawngṭai inkhawm a kal a haw hnu lawkah a chauh deuh thut vangin damdawi-in lam panpui a ni a, an ram huna chawhma dar 11-ah khan a boral ta a ni. Hmingliana hian a nupui leh fate pali a boralsan a ni.