Mystical Mizoram Ṭhazual Lengzem ; Kimkima hmangaihna ri a mawi
Kumina Mystical Mizoram Ṭhazual Lengzem chart hmasa berah Kimkima'n ro a rel nghal a, a hla hit 'Hmangaihna rimawi' hmangin chart-ah pakhatna a ni.
Ṭhazual music video hmuhnawm berin chart-ah ro a rel
Kimkima 'Hmangaihna rimawi' hi Ṭhazual Award 2021-a Best Music Video award dawngtu kha a ni miau a, Ṭhazual chart-a pakhatna a ni pawh hi a mak lo.
YouTube lama a dah chhuah aṭanga thla khat hnu vel lekah he award hlu tak hi Kimkima hian a dawnpui thei a, chumai bakah chuan thla hnih chhung velin thlirtu nuai ruk chuang a nei der tawh. Reuben Lalmalsawma music video direct 'Hmangaihna rimawi' MV hi hmuh a nuamin awmze nei tak a ni a, Kimkima hian a sa thiamin a sa mawi bawk nen, chart-a pakhatna a ni pawh hi a phu hle a ni.
Chart hmasa lamah kha chuan pangana a ni a, tunah erawh nasa taka hma sawnin pakhatna hial a rawn ni ta a, chart lehah he dinhmun hi a la luah chhunzawm thei dawn em tih erawh hriat a chakawm tawh viau mai.
Rebecca Lallawmsangi 'Zinkawng' pahnihna a ni ta
Rebecca Lallawmsangi kan hria. A hla thar apiang a hit zel dawn emaw tih tur a ni. 'Zinkawng' pawh hi a hla thar ber niin tunah chuan maktaduai chuangin an thlir leh tawh! Chart-ah roreltu a ni thuai dawn tih a chiang.
Rebecca-i hian a hla hit ber mai 'Kan khua' kha YouTube lamah thlirtu maktaduai 12 chuang a neihpui der tawh a, he hlain a thlen chin apiang hi chu Mizo hla bikah chuan record a ni chho zel tawh.
Chart-a 'hot'
Asawmi Khiangte & Darev ft Fuse 'Lenglerhlengi' chu pathumna a ni ta a, Lelte leh Ṭhazual award lama che ṭha tak Siampuii Ralte chuan 'Sawisel bo' chu palina a rawn nihpui bawk. Latei Hringngen chuan 'A ṭha vek e' hmangin top 5 a khar a ni.
Tun ṭum Ṭhazual Lengzem chart top 10-ah hian Marina V Varte, Mood Station, PC Lalnunpuii, Lalnunsanga leh Pca & Rka-te chu an lang bawk.
Ṭhazual Lengzem Top 10:-
1 Kimkima Hmangaihna rimawi
2 Rebecca Lallawmsangi Zinkawng
3 Asawmi Khiangte & Darev ft Fuse Lenglerhlengi
4 Siampuii Ralte Sawisel bo
5 Latei Hringngen A ṭha vek e
6 Marina V Varte Aw Valmawi
7 Mood Station Suangtuah hmun
8 PC Lalnunpuii Ka leng zo lo
9 Lalnunsanga Zua lo hrailengte
10 Pca & Rka Hmangaih LM