BLACKPINK Lisa spotify record thar chu...

K-pop group BLACKPINK member Lisa solo album-a hla 'Money' chuan khawvela music streaming platform lian ber Spotify-ah record thar a siam a, K-Pop solo artist hla vawi maktaduai 300 stream nei chak ber a ni.

Lisa agency YG Entertainment chuan December 30 khan hemi chungchang hi tarlangin Spotify-ah hian an artist hla hi vawi maktaduai 300 stream tlin a ni tawh tih an puangzar. Lalisa hian a hla hi September 10-a a tlangzarh kha niin, a tlangzarh aṭanga ni 112 chhungin hetiang dinhmun hi a thleng hman.

Korean solo artist zinga he record lo siam hmasa tawhtu pawh Lisa-i ṭhiannu Jennie a ni a, a hla 'Solo' kha ni 960 chhungin Spotify-ah hian vawi mtd 300 stream a ni hman a, Lisa hian chu record chu a rawn khum ta a ni.

Lisa solo album 'Lalisa' khan tlangzarh a nih tirhah khan ram 72 laiah iTunes Top Song chart topper a lo ni tawh nghe nghe a, Global YouTube Song Top 100 chart-ah pawh kar hnih chhung a zawnin topper a ni tawh bawk.

Billboard Hot 100 chart-ah pawh a album-a hla a dah pahnih 'Lalisa' leh 'Money' -te chu an lang ve ve a ni.